Նիկոլ Փաշինեանը Հանդիպած Է Պելճիգայի Հայ Գործարարներու Հետ

Պելճիգայի Թագաւորութիւն աշխատանքային այցի առաջին օրուան աւարտին` մարտ 4-ի երեկոյեան, վարչապետ Նիկոլ Փաշինեան հանդիպած է հայ համայնքի գործարար շրջանակներու ներկայացուցիչներու հետ, որոնք գործունէութիւն կը ծաւալեն ադամանդագործութեան, անշարժ գոյքի, բեռնափոխադրումներու ոլորտներուն մէջ: Հանդիպումը տեղի  ունեցած է Պրիւքսէլի «Վիլլա Ամպեն» արեւելքի եւ արեւմուտքի մշակոյթներու եւ երկխօսութեան կեդրոնին մէջ:

Ինչպէս «Հայերն այսօր»-ին կը յայտնեն ՀՀ կառավարութեան մամլոյ ծառայութենէն, աշխատանքային ընթրիքի ծիրէն ներս քննարկուած են հայ-պելճիգական գործարար կապերու ընդլայնման վերաբերող հարցեր:

Վարչապետը ներկայացուցած է տնտեսական արմատական բարեփոխումներու ուղղութեամբ կառավարութեան կողմէ ձեռնարկուող քայլերը, ինչպէս նաեւ գործարար միջավայրի շարունակական բարելաւման, ներդրումներու ներգրաւման, կարգաւորումներու դիւրացման, օրէնսդրական դաշտի բարելաւման, կաշառակերութեան դէմ  պայքարի ծիրէն ներս տարուող աշխատանքները: Նիկոլ Փաշինեան նշած է, որ կառավարութիւնը շահագրգռուած է խորացնել երկկողմ տնտեսական համագործակցութիւնը եւ համատեղ ծրագիրներ իրականացնել:

* * *

Վարչապետի հետ հանդիպման կը մասնակցէին Պելճիգայի հայազգի գործարարներ` Պօղոսեան հիմնադրամի նախագահ Ժան Պօղոսեան, Ռալֆ Պօղոսեան, Շահէ Արսլանեան,Վիգէն Արսլանեան, Սահակ Արսլանեան, Կարէն Արսլանեան, Անտրէ Կումուշեան, Ֆիլիփ Պարսամեան, Անտոն Աքքայեան, Համբիկ Իպլեկչեան, Անրի Իպլեկչեան, Մարգար Գրիգորեան, Եանիկ Քալանթարեան, Գրիգուար Ժախեան, Ալպերթ Գարազիւան, Պելճիգա-հայկական առեւտրաարդիւնաբերական պալատի տնօրէն Վալերի Սաֆարեան, ՀԲԸՄ Պելճիգայի գրասենեակի տնօրէն, Պելճիգայի հայերու կոմիտէի նախագահ Նիկոլա Դաւիթեան, Եւրոպայի Հայ դատի գրասենեակի նախագահ Գասպար Կարապետեան, Պելճիգայի հայերու համագումարի նախագահ Միշէլ Մահմուրեան, Պելճիգայի հայ առաքելական եկեղեցւոյ հայոց հոգեւոր հովիւ Հայր Զատիկ Աւետիքեան:

Scroll Up