Միւնիխի «Անուշ» Պարի Եւ Մշակոյթի Կեդրոնին Մէջ Նշուած Են Տեառնընդառաջի Եւ Սուրբ Սարգիսի Տօները

«Հայերն այսօր»-ի տեղեկացմամբ, Միւնիխի հայ-գերմանական «Անուշ» պարի եւ մշակոյթի կեդրոնին մէջ փետրուար 14-ին կայացաւ «Երէք տօնը` մէկտեղ» խորագիրով երեկոյ` նուիրուած Տեառնընդառաջի եւ Սուրբ Սարգիսի տօներուն:

Ձեռնարկին ներկայ էին համայնքի ներկայացուցիչներ, երիտասարդներ, դեռահասներ ու փոքրիկներ: Փոքրիկները` մեծերու օգնութեամբ, հայկական երաժշտութեան եւ զրոյցներու ներքոյ պատրաստած են փոխինձ, իսկ երիտասարդները` աղիբլիթ: Պատմաբան Յակոբ Ջորոյեանի հետ տեղի ունեցած է հետաքրքիր պատմական զրոյց, ապա հարց ու պատասխան Սուրբ Սարգիսի եւ Տեառնընդառաջի մասին:

Աւելցնենք, որ Գերմանիոյ Միւնիխ քաղաքի «Անուշ» պարի եւ մշակոյթի կեդրոնը բացուած է 2018 թուականի մարտ 8-ին, որուն նպատակը Միւնիխի մէջ ապրող հայերու, յատկապէս` երիտասարդներու համար հայապահպանութեան, ազգային նկարագրի եւ աւանդոյթներու պահպանման, հայեցի կրթութեան եւ գեղագիտական դաստիարակութեան կազմակերպումն ապահովելն է:

 

Scroll Up