Վիրահայոց Թեմէն Ներս Բուն Բարեկենդանը Նշուած է Աւանդական Հարիսայի Փառատօնով

Մեծ Պահքին նախորդող օրը՝ Մարտ 3-ին նշուող Բուն Բարեկենդանը՝ Վիրահայոց Թեմի գործող եկեղեցիներուն մէջ նշանաւոր դարձած է Սուրբ եւ Անմահ Պատարագով: Թիֆլիսի Սուրբ Գէորգ առաջնորդանիստ եկեղեցւոյ մէջ, Սբ. Պատարագը մատուցուած է Վիրահայոց թեմի առաջնորդ Գերաշնորհ Տէր Վազգէն եպիսկոպոս Միրզախանեանի հանդիսապետութեամբ: Այս մասին կը հաղորդէ armenianchurch.ge-ը։

Հաւարտ Սրբազան արարողութեան, թեմակալ առաջնորդը ներկաները շնորհաւորած է Բուն Բարեկենդանի տօնին առիթով, մաղթած հոգիով եւ մարմնով ամրապնդուած անցնել Մեծ Պահքի ճանապարհը: Վազգէն Սրբազանը օրհնութեան եւ գնահատանքի խօսքեր ուղղած է արժ. Տէր Մանուկ քահանայ Զէյնալեանին, որ ծառայութեան կը փոխադրուի ՀՀ զինուած ուժեր եւ մաղթած անոր նուիրական հոգեւոր ծառայութիւն հայոց բանակին մէջ: Ի յիշատակ Վրաստանի մէջ իրականացուցած ծառայութեան տարիներուն՝ թեմակալ առաջնորդը Տէր Մանուկ քահանային նուիրած է թիֆլիսեան պատկերով գեղանկար:

Բուն Բարեկեդանին նուիրուած է նաեւ աւանդական հարիսայի փառատօնը, որ Վիրահայոց թեմի առաջնորդարանի աջակցութեամբ կազմակերպած էր Վրաստանի հայ կանանց «Շուշանիկ» միութիւնը, Վիրահայոց թեմի «Հայարտուն» կեդրոնին մէջ:

Թիֆլիսահայ համայնքին մէջ, գեղեցիկ այս փառատօնը, կ՝իրականացուի 2012 թուականէն անընդմէջ, տարուէ տարի ընդարձակուելով՝ անիկա վերածուած է ժողովրդական տօնահանդէսի:
Կեդրոնի Գալուստ Կիւլպէնկեան սրահի երկայնքով շարուած իւղալի եւ համեղ հարիսայով երեսուն կաթսաներն ու կաւէ կճուճները գեղեցկացուցած են հայ տիկնայք:

Իրենց պատրաստած հարիսայով ներկայացած են Վրաստանի մէջ ՀՀ դեսպանութիւնը, «Մայիսբար» ճաշարանը, «Հայարտուն» կեդրոնի «Սբ. Մովսէս Խորենացի» նախակրթարանը, միօրեայ դպրոցներու սաները, «Սբ. Ներսէս Շնորհալի» երգչախումբը, «Տարօն» պարախումբը, տհոլի եւ տուտուկի խումբերը, Թեմի երիտասարդական բաժինը, «Շուշանիկ» միութեան անդամները, բազում կամաւորներ:

Վիրահայոց թեմի առաջնորդ Գերաշնորհ Տէր Վազգէն եպիսկոպոս Միրզախանեան շնորհաւորած է հայ տիկնանց՝ Վրաստանի մէջ նշուող Մայրութեան օրուան առիթով, Վրաստանի մէջ ՀՀ արտակարգ եւ լիզօր դեսպան Ռուբէն Սադոյեանը՝ Դիւանագէտի օրուան առիթով, օրհնած է հարիսայով կաթսաները եւ ներկաները հրաւիրած համտեսելու համեղ  ճաշատեսակը: Դահլիճին մէջ տարածուած է ուրախ երգն ու երաժշտութիւնը: Օրհնուած հարիսայ փոխանցուած է նաեւ հիւանդներուն եւ տարէցներուն: Բուն Բարեկենդանի տօնակատարութեան ներկայ եղած են Իսանի շրջանային վարչութեան նախագահ Կախա Լապուչիձէն, տեղակալ Կիորկի Ռչէվլիշվիլին, շրջանային վարչութեան աշխատակիցներ, քաղաքի Սակրեբուլոյի ազգային փոքրամասնութիւններու բաժինի ղեկավար Ռիթա Խիտիրպէկաշվիլին, լուտէրական եկեղեցւոյ ներկայացուցիչներ, Վրաստանի հայերու միութեան նախագահ Հենրիխ Մուրատեանը, Պ. Ադամեանի անուան հայկական պետական դրամատիկական թատրոնի գեղարուեստական ղեկավար Արմէն Բայանտուրեանը, բազմաթիւ հիւրեր եւ  հաւատացեալներ:

Scroll Up