Բանակի Օր Եւ Տեառնընդառաջ Փասատենայի Շաբաթօրեայ Վարժարանին Մէջ

ԱՄՆ-ի Փասատենա քաղաքի  Ս. Գրիգոր Լուսաւորիչ շաբաթօրեայ վարժարանը Փետրուար ամսոյն մէջ տօնեց հայկական ԶՈւ-ի Բանակի օրը եւ Տեառնընդառաջը: Այս մասին Հայերն այսօր-ին կը տեղեկացնէ Ս.Գրիգոր Լուսաւորիչ շաբաթօրեայ վարժարանի տնօրէն Նորայր Տատուրեան:

Առաջին տօնակատարութիւնը հայկական ԶՈւ-ին նուիրուած Բանակի օրն էր: Աշակերտները 2 Փետրուարին, շաբաթ կէսօրին հաւաքուեցան վարժարանի սրահին մէջ ու հիացումով դիտեցին բանակի երեւանեան տողանցքէն տեսարաններ: Ո՛չ-հայկական վարժարաններ յաճախող եւ ծնողներուն մեծամասնութիւնը ԱՄՆ ծնած երեխաներու համար զինուոր եւ հրասայլ տեսնել, տողանցք դիտել, հանրապետութեան օրհներգէն բացի զինուորական քայլերգ լսել բացառիկ երեւոյթ էր: Ապա անոնք դիտեցին սահիկներու պատկերազարդ ցուցադրութիւն մը: Իւրաքանչիւր սահիկ ունէր հայկական զինուած ուժերու վերաբերեալ վիճակագրական տուեալ մը: Վերջաւորութեան աշակերտները յոտնկայս երգեցին Հայաստանի Հանրապետութեան օրհներգը ու միաբերան շնորհակալութիւն յայտնեցին քաջ հայ զինուորին:

16 Փետրուարին, Շաբաթ օր վարժարանը ապրեցաւ մէկ այլ խանդավառ օր- անոր աշակերտները միջօրէին տօնեցին Տեառնընդառաջը, որ ժողովուրդին ծանօթ է նաեւ որպէս Տրնդեզ: Անոնք նախ համախմբուեցան կրակին շուրջ, պարեցին հայկական շուրջպարը, ապա բարձր տրամադրութեամբ, մէկ առ մէկ անցան բոցերուն վրայէն: Ամենափոքրիկ սանիկները զերծ չմնացին այս աւանդական արարողութենէն: Անոնք աւագ քոյր-եղբայրներու, կամ ուսուցիչներու ձեռքէն բռնած անցան կրակին վրայէն: Աւարտին վարժարանի տնօրէն Նորայր Տատուրեանը մաղթեց, որ բոլոր աշակերտներուն մէջ հայութեան ինքնութիւնը այդ կրակին պէս անմար մնայ:

Scroll Up