Տեառնընդառաջի Տօնը Դամասկոսի մէջ

Չորեքշաբթի 13 Փետրուար, 2019-ի երեկոյեան, Դամասկոսի Սբ. Սարգիս Եկեղեցւոյ մէջ տեղի ունեցաւ Տեառնընդառաջի նախատօնակի արարողութիւնը: Յետ երեկոյեան հանդիսաւոր ժամերգութեան, թեմիս բարեջան Առաջնորդ Տէր Արմաշ Ս. Եպս. Նալպանտեանը, իր քարոզով հաւատացեալներուն փոխանցեց Տեառնընդառաջի խորհուրդը եւ անոր հետ կապուած ժողովրդական սովորոյթներն ու աւանդութիւնները:

Յաւարտ նախատօնակի արարողութեան տեղի ունեցաւ նաեւ Ն.Ս.Օ.Տ.Տ. Գարեգին Բ Ամենայն Հայոց Հայրապետի կողմէ հաստատուած եւ աւանդական դարձած նորապսակներու օրհնութեան կարգը: Սրբազան Հայրը անգամ մը եւս, նորապսակ զոյգերուն իր հայրական պատգամով շեշտեց ամուսնական կեանքի սրբութիւնը եւ անդրադարձաւ այժմէական կեանքի դժուարութիւններուն եւ անոնց դիմագրաւելու միջոցներուն:

Յետ արարողութեան եկեղեցւոյ շրջաբակին մէջ նախապէս պատրաստուած խարոյկի հրավառութիւնը տեղի ունեցաւ, երբ Սրբազան Հայրը նորապսակ զոյգերու ուղեկցութեամբ եկեղեցւոյ սուրբ խորանէն բերուած կրակով լուցեց աւանդական խարոյկը:

Դիւան Ազգ. Առաջնորդարանի
Դամասկոս 14 Փետրուար, 2019

Scroll Up