«Աստուած Օգնակա՞ն», Թէ՞ «Օրհնեցէ՛ք, Տէր Հայր»

«Աստուած օգնական, Վեհափառ Տէր», «Աստուած օգնական, Սրբազան Հայր», «Աստուած օգնական, Հայր Սուրբ», «Օրհնեցէք, Տէր Հայր»: Ասոնք այն արտայայտութիւններն են, որոնցմով մենք ողջոյնի եւ ցտեսութեան փոխարէն կ՛ըսենք հոգեւորականներուն:

Ինչպէ՞ս դիմել, ինչի՞ն ուշադրութիւն դարձնել նախքան բարեւելը. այս հարցերու պատասխանները կը փորձենք միասին բացայայտել:

Բոլոր այն հոգեւորականներուն, որոնք հրաժարած են ամուսնական կեանքէն, ընտրած դէպի Աստուած տանող բարդ ու պատասխանատու ճանապարհը, անոնց մենք պարտադիր կ՛ողջունենք «Աստուած օգնական» դիմելաձեւով: Ատիկա  կը բացատրուի անով, որ Աստուած օգնական ըլլայ անոնց կեանքի բոլոր իրավիճակներուն մէջ, որովհետեւ ընտրած են այնպիսի ուղի, որմով ամբողջ կեանքին մէջ կը պարտաւորուին անցնիլ մենակ եւ դիմակայել բոլոր այն  մարտահրաւէրները, որոնք կը սպասեն անոնց:

Այդ հոգեւորականներու շարքին են` կաթողիկոսը, եպիսկոպոսը, պատրիարքը, ծայրագոյն վարդապետը, վարդապետը, աբեղան:

Յաջորդ դիմելաձեւը, որմով մենք կ՛ողջունենք քահանաներուն` «Օրհնեցէք, Տէր Հայր»-ն է:

Ի տարբերութիւն վերը նշուած հոգեւորականներուն` քահանաները կ՛ամուսնանան: Հէնց քահանաներն են, որ անմիջական շփում ունին հաւատացեալներու հետ, կ՛ապրին հովուական կեանքով եւ կը կատարեն բազմաթիւ ծիսական արարողութիւններ: Ուստի մենք քահանաներէն կը հայցենք օրհնութիւն, սակայն ատիկա  չի նշանակեր, որ կուսակրօն հոգեւորականներն իրաւունք չունին մարդոց օրհնելու:

Սովորաբար մարդոց կը հետաքրքրէ այն հարցը, թէ ինչպէ՞ս հասկնալ տուեալ հոգեւորականը ի՞նչ եկեղեցական դիրք ունի ըստ այնմ որոշել դիմելաձեւը: առաջնորդարանի Ս. Սարգիս եկեղեցւոյ խորհրդակատար Տէր Եսայի քահանայ Արթենեանի հետ զրոյցին պարզեցինք, որ տարբերակելու հիմնական միջոցը հագուստն է. «Մարդիկ երբեմն կը շփոթեն, ոմանք ալ` չեն գիտեր: Ես միշտ կը յորդորեմ մարդոց, որ հարցնեն տուեալ հոգեւորականին` ինչպէս դիմել, ատոր մէջ որեւէ ամօթալի բան չկայ: Իսկ այն մարդիկ, որոնք քիչ թէ շատ ծանօթ են եկեղեցական կոչումներուն, ունին որոշակի գիտելիքներ, ապա անոնց համար շատ հեշտ է կողմնորոշուիլ հագուստով: Կուսակրօն հոգեւորականները վեղար  կը կրեն, իսկ ամուսնացեալ քահանաները` ոչ: Քահանաները կը կրեն սեւ կապայ, իսկ եպիսկոպոսներն ու կաթողիկոսը, բացի սեւէն, կը կրեն կապոյտ, սպիտակ, մոխրագոյն կապայ, իսկ ահա կաթողիկոսը արտաքինով կը տարբերի նաեւ վեղարի վրայ խաչ ունենալով: Ամուսնացեալ քահանաները կը կրեն ոչ ականակուռ լանջախաչ, իսկ վարդապետներու լանջախաչը ականակուռ է: Եպիսկոպոսն ու կաթողիկոսը կը կրեն պանակէ»:

Ահա այս փոքրիկ մանրամասնութիւններու միջոցով կարելի է կռահել, թէ ինչպէս դիմել հոգեւորականին:

Լիլիանա Օսիպեան

Աղբիւրը` qahana.am

 

 

Scroll Up