Զուիցերիոյ Նոշատել Քաղաքին Մէջ Հայկական Հոգեւոր Եւ Կրթամշակութային Կեդրոն Կը Բացուի

Զուիցերիոյ Նոշատել քաղաքին մէջ հայ  երիտասարդներու նախաձեռնութեամբ փետրուար 10-ին տեղի պիտի ունենայ հոգեւոր եւ կրթամշակութային կեդրոնի բացման հանդիսաւոր արարողութիւնը:

Ինչպէս կը հաղորդէ «Հայերն այսօր»-ը, կեդրոնին նպատակը հոգեւոր արժէքներու, հայոց լեզուի եւ գրականութեան, հայ ժողովուրդի պատմութեան, հայ աւանդական պարերու, երգ-երաժշտութեան ուսուցման, պահպանման ու տարածման միջոցով տեղի հայ զաւակներուն հայեցի կրթութիւն եւ դաստիարակութիւն տալն է, հայապահպանութիւնը, ինչպէս նաեւ Զուիցերիոյ  հայկական համայնքի տարածաշրջանի անդամներուն համախմբելը: Կը նախատեսուի նաեւ ամսուան մէջ մէկ-երկու անգամ Սբ. Պատարագի մատուցում` կեդրոնի սրահին կից գտնուող վարձակալած եկեղեցիին մէջ:

Կեդրոնի բազմաժանր ծրագիրներու ծիրէն ներս առաջինը հայ աւանդական պարերու ուսուցումն ու պարային խումբի կազմաւորումն է, որ պիտի  իրականացնէ պարուսոյց, «Շաւիղ» նախաձեռնութեան հիմնադիր-անդամ Յովան Դաշտոյեան:

Ձեռնարկին հրաւիրուած են Զուիցերիոյ Հայոց Թեմի Առաջնորդական տեղապահ Տէր Գուսան վարդապետ Ալճանեան, Զուիցերիոյ մէջ Հայաստանի Հանրապետութեան դեսպանատան ներկայացուցիչներ եւ այլ հիւրեր:

Աւարտին տեղի պիտի ունենայ հիւրասիրութիւն, պար եւ երաժշտութիւն:

 

Scroll Up