Դանիայի Աւագ Դպրոցներէն Մէկուն Մէջ Հայոց Ցեղասպանութեան Նուիրուած Դասընթաց Իրականացուցած են

Դանիայի Հելսինկէ համայնքի աւագ դպրոցի 90 աշակերտներուն համար իրականացուած է Հայոց Ցեղասպանութեան նուիրուած յատուկ դասընթաց, որ նախաձեռնած է դպրոցի ուսուցիչ Մարթին Թորպէորն Գնուտսընը (Martin Thorbjքrn Knudsen)՝ Դանիայի մէջ Հայաստանի դեսպանութեան աջակցութեամբ:

ՀՀ ԱԳՆ լրատւութեան եւ հանրային դիւանագիտութեան վարչութեան տեղեկութիւններով՝ դասընթացի մեկնարկին Մարթին Գնուտսըն աշակերտներուն ներկայացուցած է Հայոց Ցեղասպանութեան պատմութիւնը` մասնաւորապէս խօսելով երիտթուրքերու կողմէ հայերու ծրագրային ոչնչացման դրդապատճառներուն ու ցեղասպանութեան հետեւանքներուն մասին: Գնուտսըն անդրադարձած է նաեւ Թուրքիոյ իշխանութիւններուն` Հայոց Ցեղասպանութեան հետեւողական ժխտման քաղաքականութեան եւ ցեղասպանութիւններու գիտակցման ու ընդունման կարեւորութեան` իբրեւ ապագայ սերունդներու երկխօսութեան ու համերաշխութեան երաշխիք:

Դասընթացին, իբրեւ հիմնական դասախօսներ հրաւիրուած են դանիացի պատմաբան եւ համեմատական ցեղասպանագիտութեան մասնագէտ Մաթիաս Պէորնլունտը (Matthias Bjքrnlund) եւ Դանիայի մէջ Հայաստանի դեսպան Ալեքսանդր Արզումանեանը: Մաթիաս Պէորնլունտ «Հայոց Ցեղասպանութիւն. սկիզբէն մինչեւ վերջ» գիրքին հեղինակն է, որ տպագրուած է դանիերէն լեզուով, 2013-ին եւ լայն արձագանգի արժանացած է Դանիայի հասարակական, քաղաքական եւ գիտական շրջանակներու մէջ:

Մաթիաս Պէորնլունտի դասախօսութիւնը նուիրուած եղած է 19-20-րդ դարերու հայոց պատմութեան, նախապէս հայերով բնակեցուած տարածքներու նկարագրութեան եւ հայաթափման ողբերգալի իրադարձութիւններուն: Ան հանգամանալից ներկայացուցած է միջազգային հանրութեան կողմէ Հայոց Ցեղասպանութեան ճանաչման գործընթացին եւ հարցին առնչութեամբ եւրոպական երկիրներու դիրքորոշման մասին, ինչպէս նաեւ անդրադարձած է Հայոց Ցեղասպանութեան հետ կապուած սքանտինաւեան արձագանգին ու հազարաւոր հայ երեխաներու կեանք փրկած դանիացի միսիոներներ Քարէն Եփփէի (Karen Jeppe) ու Մարիա Ճաքոպսընի (Maria Jacobsen) մարդասիրական գործունէութեան:

Դեսպան Արզումանեանի դասախօսութեան առանցքը ցեղասպանութեան յանցագործութեան դատապարտման ու կանխարգիլման ուղղուած միասնական պայքարի կարեւորութիւնը ներկայացնելը եղած է: Այդ ծիրէն ներս, դեսպանը առանձնացուցած է 2015-ին Հայաստանի նախաձեռնութեամբ ՄԱԿ-ի Մարդու իրաւունքներու խորհուրդին կողմէ միաձայն ընդունուած՝ Ցեղասպանութեան կանխարգիլման բանաձեւն ու ՄԱԿ-ի Գլխաւոր ասամպլէայի կողմէ Դեկտեմբեր 9-ը Ցեղասպանութեան յանցագործութեան զոհերու յիշատակի միջազգային օր հռչակելու շարունակական ջանքերը: Ան նշած է, որ անցեալ տարուան Դեկտեմբերին Երեւանի մէջ իրականացած է «Ընդդէմ ցեղասպանութեան յանցագործութեան» 3-րդ համաշխարհային համագումարը, որ արդէն իսկ իրազեկուածութեան բարձրացման եւ կրթութեան խրախուսման միջոցով ցեղասպանութիւններու կանխարգիլման ու այդ յանցագործութեան դէմ միասնական պայքարի կարեւոր հարթակ դարձած է։

Scroll Up