Ռումանիոյ Հայոց Թեմի Առաջնորդը Շնորհաւորական Ուղերձ Է Յղել Նիկոլ Փաշինեանին

«Հայերն այսօր»-ը ներկայացնում է Ռումանիոյ Հայոց թեմի առաջնորդ Տ. Տաթեւ եպիսկոպոս Յակոբեանի շնորհաւորական ուղերձը Նիկոլ Փաշինեանին` ՀՀ վարչապետի պաշտօնում նշանակուելու առիթով:

ՀՀ ՎԱՐՉԱՊԵՏ

ՏԻԱՐ ՆԻԿՈԼ ՓԱՇԻՆԵԱՆ

Բուխարեստի Սրբոց Հրեշտակապետաց Առաջնորդանիստ Մայր Տաճարից Մեր շնորհաւորանքներն ու օրհնութիւնն ենք յղում Ձեզ` Հայաստանի Հանրապետութեան Վարչապետի պաշտօնում վերստին նշանակուելու կապակցութեամբ:

Վստահ ենք, որ պատմական ու շրջադարձային իրադարձութիւններով լի այս ժամանակաշրջանում, ունենալով հայ ժողովրդի վստահութեան քուէն, պիտի կերտէք Հայաստանի Հանրապետութեան պատմութեան փառաւոր էջերից մէկը: Հաւատում ենք, որ վերանորոգութեան, բարեփոխումների եւ փոխադարձ վստահութեան այն ոգին, որ ստեղծուել է իշխանութեան եւ հասարակութեան միջեւ, յետայսու պատճառ եւ առիթ պիտի դառնայ իրական խնդիրների մէջ խորամուխ լինելու եւ առաւել բարեկեցիկ պետութիւն կերտելու առաքելութեան ճանապարհին:

Բազում են մեր ժողովրդի առաջ ծառացած մարտահրաւէրներն ու ոտնձգութիւնները, ներքին ու արտաքին թշնամիների դաւերն ու հարուածները, որոնք ուղղուած են մեր Հայրենիքի անվտանգութեան սասանմանը, ազգային, բարոյական ու սրբազան արժէքների ոտնահարմանը: Բայց դուք կարողացաք հայ ժողովրդի Մեր զաւակների մէջ վերարթնացնել արդար ու պաշտպանուած Հայրենիքում ապրելու յոյսն ու հաւատը, ապագայի հանդէպ առաւել լաւատեսօրէն տրամադրուելու կարողութիւնը: Եւ հաւատում ենք, որ մեր ժողովուրդն այլեւս հիասթափութեան ու ընկճումի, տատանումների ու երկմտանքի պահեր չի ապրելու, չի հիասթափուելու եւ ականատեսն է լինելու վերածննդի ու վերազարթօնքի ազգային կեանքի բոլոր ասպարէզների մէջ:

Ի սրտէ շնորհաւորում ենք եւ մաղթում, որ Աստծոյ օգնականութեամբ Ձեր կառավարման տարիները հայոց անկախ պետականութեան պատմութեան մէջ նշանաւորուեն նորանոր վերելքներով, առաջընթացներով ու բարգաւաճումով` կառուցելով առաւել հզօր, բարեկարգ եւ ապահով երկիր:

Աղօթում ենք Ձեզ համար եւ հայցում ենք Բարձրեալի զօրակցութիւնը` մաղթելով առողջ եւ օրհնեալ օրեր, անսպառ եռանդ եւ բեղմնաւոր գործունէութիւն:

Օրհնութեամբ`

Տ. Տաթեւ եպիսկոպոս Յակոբեան

Առաջնորդ Ռումանիոյ Թեմին Հայոց

 

 

Scroll Up