«Թիկունքիս Զգացի Շուէտահայերու Աջակցութիւնը». Շուէտի Խորհրդարանի Հայազգի Պատգամաւոր

2018 թուականի սեպտեմբեր 9-ին կայացած Շուէտի խորհրդարանական ընտրութիւններուն շուէտահայ Արին Կարապետը ընտրուեցաւ պատգամաւոր:

349 պատգամաւորներու մէջ Ռիքստակի (շուէտական խորհրդարան) միակ հայ պատգամաւորն է:

Այս առիթով «Հայերն այսօր»-ը կապ  հաստատած է մեր հայրենակիցին հետ` զրուցելու անոր յառաջիկայ ծրագիրներուն եւ ընելիքներուն շուրջ, ինչպէս նաեւ շնորհաւորելու ուրախալի լուրին  համար:

-Արի՛ն, ինչու՞ որոշեցիք մասնակցիլ Շուէտի խորհրդարանի (Ռիքստակ) պատգամաւորներու ընտրութիւններուն:

– Մօտաւորապէս 12 տարի առաջ ընդգրկուեցայ Մոտերէյթ կուսակցութեան երիտասարդական միութեան կազմին մէջ, իսկ արդէն այս տարուան սեպտեմբեր ամսուն ընտրուեցայ Շուէտի խորհրդարանի պատգամաւոր: Մեծնալով Շուէտի արուարձաններուն մէջ` Շուէտի հասարակութեան առնչուող շատ խնդիրներ տեսայ: Դժուարութեամբ  սորված եմ շուէտերէնը, մեծցած եմ մօրս խնամակալութեան ներքոյ, որ աշխատանք գտնելու խնդրին բազմիցս  բախուած է: Կը յիշեմ` աշխատավարձէ աշխատավարձ կ՛ապրէինք` չիմանալով կը կարենանք արդեօք կատարել բոլոր վճարումները:

Օտարազգի դասընկերներէս շատերն իմ ճակատագիրս  ունեցած են. ապաւինած են, հիմնականին մէջ, միայնակ ծնողի ուշադրութեան եւ փոքր տարիքէն դժուարութեամբ  սորված են շուէտերէնը: Այս հանգամանքը դպրոց երթալու առաջին օրուընէ խոչընդոտ յառաջացուց մեզի համար, ուր շուէտերէն չգիտնալը  ծանր պայքարի մը վերածուեցաւ: Շատ երեխաներ, որոնք այս պայքարին կ՛առնչուին, կամ ընկերային ապահովութեան կարիքը  կ՛ունենան, կամ փողոցային խմբաւորումներու մասնակիցը  կը դառնան:

Ես զգացի, որ ինծի պէս երեխաներ կեանքի եւ դպրոցի մէջ յաջողելու համար պէտք է հասարակութեան կողմէ խնդրահարոյց մարդ դիտարկուելու փոխարէն խրախուսուին, ունենան մեծ ակնկալիքներ եւ յստակ տեսլական:

Երբ հասարակութիւնն ունենայ մեծ սպասելիքներ փախստական երեխաներէն եւ անոնց տայ հնարաւորութիւն` յաւուր պատշաճի սորվելու շուէտերէնը նախադպրոցական տարիքին, ապա, անկասկած, այդ երեխաները ապագային բարձունքներու կը հասնին: Ես մտայ քաղաքականութիւն` իրականութեան մէջ ինչ-ինչ երեւոյթներ դէպի լաւը փոխելու ցանկութեամբ:

-Ընտրութիւններուն հայ այլ թեկնածուներ առաջադրուած էի՞ն:

-Այո՛, տեղական ինքնակառավարման, քաղաքային ու տարածաշրջանային ընտրութիւններուն հայ թեկնածուներ կային առաջադրուած, բայց որքան տեղեակ եմ` Խորհրդարանին մէջ միակ հայ պատգամաւորը ես եմ:

-Ի՞նչ պիտի ըլլայ Ձեր գործունէութեան հիմնական առանցքը, ո՞րն է Ձեր տեսլականը:

– Իմ թիրախային խնդիրը ներգաղթի եւ ընդելուզման խնդիրն է: Անգամն ալ կրկնեմ` հասարակութիւնը պէտք է շատ ակնկալիքներ ունենայ փախստական ծնողներ ունեցող երեխաներէն: Անոնց պէտք է տրուի աւելի լաւ պայմաններ` յաջողութեան հասնելու համար: Գաղթականութեան քաղաքականութիւնը Շուէտի մէջ այդքան ալ կայուն չէ. 2015 թուականի ցուցանիշներով Շուէտ եկած են շուրջ 160.000 փախստական: Եթէ համեմատենք Դանիոյ եւ Ֆրանսայի հետ, ապա Դանիոյ մէջ` 20.000, իսկ Ֆրանսայի մէջ` 70.000 փախստական  հաստատուած է: Այսինքն, Ֆրանսայի տուեալները մօտ եօթ անգամ կը գերազանցեն Շուէտի տուեալներուն:

Այս ամէնը կը ստեղծէ հսկայական սոցիալական մարտահրաւէր, որ պէտք է լուծենք յառաջիկայ տասնամեակներուն: Բայց, նախ եւ առաջ, անհրաժեշտ է ունենալ պատասխանատու եւ կարգաւորուած գաղթականութեան քաղաքականութիւն:

– Շուէտահայ համայնքի արձագանքն ինչպիսի՞ն էր այս լուրը լսելէ ետք:

-Միանշանակ դրական եւ ողջունելի էր արձագանքը շուէտահայ համայնքին մէջ: Առհասարակ, շատ բարձր կը գնահատեմ համայնքի իմ հայրենակիցները եւ անոնց անկեղծ աջակցութիւնը, որ զգացի իմ թիկունքիս: Նոյնիսկ այն մարդոցմէ, որոնց երբեք չէի տեսած, շնորհաւորական նամակներ եւ բարեմաղթանքներ ստացայ: Շուէտահայերու աջակցութիւնը կը ջերմացնէ սիրտս:

-Որքանո՞վ կը հետեւէիք Հայաստանի մէջ տեղի ունեցող քաղաքական վերջին զարգացումներուն: Թաւշեայ յեղափոխութեան օրերուն բախտը ունեցաք Հայաստան այցելելու:

– Ի հարկէ, միշտ կը հետեւիմ Հայաստանի մէջ տեղի ունեցող քաղաքական զարգացումներուն, ամբողջապէս իրազեկուած եմ երկրի մարտահրաւէրներուն եւ խնդիրներուն:

Թաւշեայ յեղափոխութեան ընթացքին եկայ Երեւան` հետեւելու իրադարձութիւններուն եւ զգալու այն մթնոլորտը, որ կը տիրէր ամբողջ Հայաստանի մէջ: Մեծ յոյսեր ունիմ Հայաստանի ապագայի հանդէպ: Յոյսով եմ` դեկտեմբեր 9-ին տեղի ունեցած խորհրդարանական թափանցիկ արտահերթ ընտրութիւնը կը փաստէ իրական ժողովրդավարութեան հաստատումը Հայաստանի մէջ, ուր ազատութիւնն ու քաղաքացիներու իրաւունքը պարզապէս լոկ խօսքեր չեն մնար թուղթի վրայ եւ մերկապարանոց չեն հնչեր:

Կաշառակերութեան դէմ պայքարը հաւասարապէս կարեւոր է առողջ ժողովրդավարութիւն ունենալու համար: Մէկընդմիշտ յիշենք, որ ոչ մէկը բարձր է օրէնքէն, եւ կառավարութիւնը պէտք է աշխատի` ժողովուրդի բարօրութեան համար: Այլ ճանապարհ չեմ տեսներ:

Գէորգ Չիչեան

 

 

Scroll Up