Երեւանի ՄԷջ Մեկնարկեց Սփիւռքի Նախարարութեան «ՆերՈւժ» Սթարթափ Ծրագիրը

Դեկտեմբեր 16-ին «ՆերՈւժ» ծրագիրի բացման հանդիսաւոր արարողութեան ներկայ էին ՀՀ փոխվարչապետի պաշտօնակատար Տիգրան Աւինեան, կառավարութեան անդամները, սփիւռքի նախարարի պաշտօնակատար Մխիթար Հայրապետեան, IDeA հիմնադրամի տնօրէն Րաֆֆի Բաղջեան, Հայաստանի գիտութեան եւ արհեստագիտութիւններու  հիմնադրամի (FAST) գործադիր տնօրէն Արմէն Օրուջեան եւ այլք:

Ողջունելով ներկաները` սփիւռքի նախարարի պաշտօնակատար Մխիթար Հայրապետեան կարեւոր համարեց «ՆերՈւժ» ծրագիրի իրագործումը Սփիւռքի հետ յարաբերութիւններու զարգացման ծիրէն ներս: Ան մասնաւորապէս նշեց. «Չեմ չափազանցներ, եթէ ըսեմ, որ «ՆերՈւժ» ծրագիրն առանցքային նշանակութիւն պիտի ունենայ  Հայաստանի եւ սփիւռքի միջեւ գործակցութեան ծիրէն ներս: Մեր պատկերացմամբ` սա Հայաստան-Սփիւռք գործակցութեան փիլիսոփայութեան սկիզբն է, առաջին քայլն է: Ասիկա ստեղծարար ու նորարար միտք ունեցող սփիւռքահայերու համար է, որ երիտասարդները կարենան բնակութիւն հաստատել Հայաստանի մէջ, կեանքի կոչեն իրենց գործարար-գաղափարները, եւ այս առաջին քայլն է ուժեղ Հայաստան, ուժեղ Սփիւռք ունենալու համար»:

Փոխվարչապետի պաշտօնակատար Տիգրան Աւինեան իր ելոյթին մէջ նշեց, որ կառավարութեան հիմնական նպատակներէն մէկը տնտեսական յեղափոխութեան իրականացումն է: ««ՆերՈւժ»-ը հիմք կը դնէ Հայաստան-Սփիւռք նոր որակի համագործակցութեան:  Առաջին անգամ Հայաստանը  կ՛առաջարկէ ֆինանսական հնարաւորութիւններ, մասնագիտական ուսուցում եւ լայն գործընկերային ցանց ստանալու հնարաւորութիւն Աւստրալիայէն մինչեւ Հոլանտա, ԱՄՆ-էն մինչեւ Չինաստան տարածքին մէջ սփռուած 27 երկիրներու 71 սթարթափներուն: Առաջին անգամ արտասահման բնակող մեր հայրենակիցները Հայաստան կու գան ոչ միայն արեան կանչով կամ զբօսաշրջութեան նպատակով, այլ այն պատճառով, որ հայրենիքը անոնց հնարաւորութիւն կու տայ իրենց գործարարութիւնը զարգացնելու, նոր գաղափարներ առաջարկելու ու մեծ յաջողութիւններու հասնելու»,-ընդգծեց  Տիգրան Աւինեան:

Ներկաները ողջունեցին եւ բարի երթ մաղթեցին նաեւ IDeA հիմնադրամի տնօրէն Րաֆֆի Բաղջեան եւ Հայաստանի գիտութեան եւ  հիմնադրամի (FAST) գործադիր տնօրէն Արմէն Օրուջեան: Անոնք ընդգծեցին, որ գալիք օրերուն ընթացքին մասնակիցները պիտի ծանօթանան Հայաստանի սթարթափային էքոհամակարգին, անոր իւրայատկութիւններուն եւ առկայ հնարաւորութիւններուն, քննարկումներ կ’ունենան իրենց ոլորտին մէջ յաջողութիւններու հասած մասնագէտներու հետ եւ կը ծանօթանան բազում յաջողակ սթարթափերներու հետ:

«ՆերՈւժ»-ի գործընկերներ են FAST եւ IDeA հիմնադրամներ, Impact Hub-ը, Հայաստանի մէջ ՄԱԿ-ի զարգացման ծրագիրը (UNDP), Հայ-ռուսական համալսարանը, «Դէպի Հայք» կազմակերպութիւնը եւ այլն:

 

Scroll Up