«Սէրը Հայրենիք Բերաւ Ինծի…». Շանթ Քիրմիզեան

Ամերիկահայ գործարար, արտադրող, Հայաստանի մէջ «Դառգեթ» գարեջուրի գործարանի տնօրէն Շանթ Քիրմիզեան   «Հայերն այսօր»-ի  հետ զրոյցին անդրադարձած է հայրենադարձման իր պատմութեան, Հայաստան-Սփիւռք համագործակցութեան, կին-տղամարդ յարաբերութիւններուն, ինչպէս նաեւ խօսած  յայտնի երգչուհիի ամուսին ըլլալու առաւելութիւններուն եւ դժուարութիւններուն մասին:

-Ողջոյն, Շա՛նթ, կը խնդրէի`խօսիք Ձեր արմատներուն մասին:

– Ողջոյն: Ծնած եւ մեծցած եմ ԱՄՆ-ի Տէտրոյթ քաղաքին մէջ: Ընտանիքս կը սերի Կիլիկիոյ Ալեքսանդրետտա քաղաքի Իսքենտերուն շրջանէն եւ Խարբերդէն:

– Եր՞բ որոշեցիք առաջին անգամ գալ Հայաստան եւ ինչո՞ւ:

– Ծնելով եւ մեծնալով ԱՄՆ-ի մէջ եւ ապրելով Հայաստանէն հեռու` կու գայ օր մը, երբ դուն քեզի հարց կու տաս` ո՞վ եմ ես: Այդ հարցն ինծի Հայաստան բերաւ: Այնպիսի զգացողութիւն ունէի, կարծես անցեալին նաեւ եկած էի Հայրենիք:

– Շա՛նթ, ինչպէ՞ս կը գնահատէք Հայաստան-Սփիւռք յարաբերութիւնները, ի՞նչ մեխանիզմներ կ’առաջարկէք յաջող հայրենադարձութիւն կազմակերպելու հարցով:

– Բաւական աշխատանք տարուած է  այս տարիներուն ընթացքին, բայց դեռ շատ ընելիքներ ալ կան, որոնք պէտք է իրագործուին եւ կեանքի կոչուին: Իմ կարծիքովս Սփիւռքը Հայաստանի համար մեծ ներուժ է, եւ հակառակը` Սփիւռքն ալ ունի նոր Հայաստան, որուն կրնայ վստահիլ ու ապաւինիլ: Կը ցանկայի, որ PR քաղաքականութիւնը սփիւռքահայութեան եւ հայրենադարձութեան հարցերուն մէջ աւելի ճկուն ըլլար:

Ինծի  համար Իսրայէլի անցած ճանապարհը (հայրենադարձութեան եւ սփիւռքի` իր հայրենակիցներուն ընդելուզելու առումով) կը համարուի յաջողուած տարբերակ եւ մեխանիզմ, բացի ատկէ այդ երկիրը կրցած է տարիներու ընթացքին Սփիւռքի ներուժն օգտագործել երկրի տնտեսական եւ քաղաքական տարբեր ոլորտներու մէջ:

-2013 թուականին հայրենադարձուեցաք, այնուհետեւ ամուսնացաք: Դժուար չէ՞ր ԱՄՆ-ի մէջ ազատ կեանք վարելէ յետոյ երկիր ու միջավայր փոխել եւ ամուսնանալ սիրուած եւ ճանչցուած երգչուհի Յասմիկ Կարապետեանի հետ:

– Սկսիմ  անկէ, որ այդ տարի եկայ Հայաստան սեպտեմբեր 21-ին` Անկախութեան օրը: Առիթը`Յասմիկի երգի անդրանիկ ելոյթն էր: Այնպէս եղաւ, որ որոշ ժամանակ մնացի Երեւանի մէջ եւ ամիսներ անց ամուսնացայ Յասմիկին հետ: Բնականաբար, առաջին օրերը դժուար էին, սակայն ժամանակի ընթացքին յաղթահարեցի բոլոր դժուարութիւնները:

Ինչ կը վերաբերի Յասմիկի ճանաչուածութեան` կրնամ ըսել, որ հիմնական խնդիրը ինծի հասարակական վայրերու մէջ անմիջապէս ճանչնալն էր. սկզբնական շրջանին ատիկա  անսովոր էր, բայց ատոր ալ յարմարեցայ: Տէտրոյթ քաղաքին մէջ ինչ-որ չափով ես եւս ճանչցուած էի, քանի որ  կը զբաղէի երաժշտական արտադրութեամբ, քաղաքական պլոկ  ստեղծած էի եւ ունէի SOUNDKODE բեմական անունը:

– Շա՞տ բան փոխուեցաւ Ձեր դուստր` Տաթեւի ծնունդէն ետք, աշխարհընկալման ինչպիսի՞ զարգացումներ ապրեցաք: Ին՞չ ծրագիրներ ունիք Տաթեւի ապագայի հարցով:

-Բնականաբար, երեխան հիմնովին կը փոխէ աշխարհընկալման չափորոշիչները: Զոյգը կը դառնան աւելի զգուշաւոր եւ պատասխանատու: Ի հարկէ, արհեստավարժ մասնագէտ դառնալու համար, թերեւս, Տաթեւն ուսումը ստանայ եւրոպական կամ ամերիկեան առաջաւոր համալսարաններու մէջ, բայց ամէն ինչ պիտի ընեմ, որ դուստրս ապրի Հայաստանի մէջ:

Շա՛նթ, հնարաւո՞ր է  օր մը տեսնենք Ձեզ երգարուեստի դաշտին մէջ:

– Յաճախ մտածած եմ  այս հարցին շուրջ: Ես եւ Յասմիկը կը մտածենք, որ յառաջիկային կարելի է հանդէս գալ զուգերգով. ես երգեմ արեւմտահայերէն, Յասմիկը` արեւելահայերէն, կը կարծեմ` հետաքրքրիր լուծում կ’ունենայ:

-Շա՛նթ, տեղեակ եմ, որ դեռեւս 2001 թուականէն  հաւնած էք Յասմիկին, փաստօրէն, տարիներ անց Ձեր երազանքը կատարուեցաւ, եւ այսօր Յասմիկը Ձեր կինն է: Տղամարդու յաջողութիւններուն մէջ արդեօք կնոջ դերը մե՞ծ է:

– Ես հաւատացի իմ հաւատքին եւ երազանքին: Սէրն ինծի հայրենիք բերաւ: Ես դեռ այդ ժամանակ կ՛ըսէի ազգականներուս եւ ընկերներուս, որ եթէ ես  օր մը իրական կեանքիս մէջ տեսնեմ Յասմիկը, պիտի ամուսնանամ հետը: Փաստօրէն, անցան տարիները, եւ այսօր ան իմ օրինական կինն է` Յասմիկ Քիրմիզեանը:

– Ին՞չ կը կարծէք, այն հայ զոյգերը, որոնք կազմուած են Հայաստանցիներէ եւ սփիւռքահայերէ, շա՞տ կը հանդիպին խոչընդոտներու մշակութային տարբերութիւններու առումով:

– Բնական կը համարեմ, որ պէտք է ըլլան տարբերութիւններ: Օրինակ` ես ծնած եւ մեծցած եմ Միացեալ Նահանգներու մէջ, իսկ Յասմիկը` Հայաստանի մէջ: Շատ ու շատ հարցերով ես աւելի ազատ կը մտածեմ ու չունիմ բարդոյթներ: Մենք իրարմէ շատ բան պիտի սորվինք այս տարիներու ընթացքին: Բնական կը համարեմ նաեւ, որ ընտանիքէն ներս կ՛ըլլայ առողջ վիճաբանութիւն, որ կրկին կու գայ մտածելակերպի տարբերութենէն: Այնուամենայնիւ, հասկցայ, որ կեանքի կարեւոր հարցերուն մէջ մենք նման ենք իրար. ինչ ըսել  է սէր, ընտանիք, մարդկային ազնուութիւն, աշխարհի նկատմամբ մեր պատկերացումները եւ այլ հարցեր:

-Կը պատմէ՞ք «Դառգեթ» գարեջուրի գործարանին մասին, եւ կա՞ն այլ հայրենադարձներ, որոնք եւս կ՛աշխատին  այդտեղ:

– Այս շրջանին մօտ 90 վայրեր կ՛օգտուին մեր գարեջուրէն: Ներկայիս կը ծաւալենք աշխոյժ գործունէութիւն առեւտուրի եւ PR առումներով, արտասահմանեան շարք մը գործընկերներ ունինք, որոնց հետ աշխոյժ կը համագործակցինք: Սփիւռքահայ աշխատող եւս ունինք, ան  քանի մը  տարի առաջ հայրենադարձուած է Սուրիայէն: Հայաստան ներդրումներու առումով շատ բաց է եւ հեշտ, այդ իսկ պատճառով Սփիւռք ապրող մեր հայրենակիցներուն կոչ կ՛ընեմ, անպայման կատարեն իրենց առաջին գործարար քայլերը Հայրենիքի մէջ:

Սեւադա Սաֆարեան

Scroll Up