Սփիւռքի նախարարութեան աշխատակիցը Չինաստանի մէջ մասնակցած է Նոր Հայաստանին նուիրուած գիտաժողովին

Չինաստանի Փեքին քաղաքին մէջ նոյեմբեր 10-12 տեղի ունեցած է «Նոր Հայաստանը եւ անոր տարածաշրջանային կարեւորութիւնը» թեմայով միջազգային գիտաժողովը, որ կազմակերպած էր Չինաստանի միջազգային բարեկամական կապի ընկերակցութեան (China Association for International friendly contact) Խաղաղութեան եւ զարգացման հետազօտութիւններու կեդրոնը: Գիտաժողովին մասնակցած է ՀՀ սփիւռքի նախարարութեան Հայրենադարձութեան եւ հետազօտութիւններու վարչութեան Հայրենադարձութեան բաժնի պետ, պատմական գիտութիւններու թեկնածու Յովհաննէս Ալեքսանեան:

Գիտաժողովը ներկայացուցչական էր, մասնակցած են Փեքինի, Շանհայի, Տալեանի գիտական ու համալսարանական տարբեր հաստատութիւններու ներկայացուցիչներ, կարդացուած է աւելի քան 20 զեկուցում, առանձնացուած են  քանի մը հիմնական թեմաներ եւ ուղղութիւններ` Հայաստանի քաղաքական, տնտեսական, ընկերային զարգացումները, միջազգային ու տարածաշրջանային իրավիճակը Հայաստանի շուրջ, «Մէկ գօտի, մէկ ճանապարհ» չինական նախագիծը եւ այլք:

Գիտական այդ նստաշրջանին մասնակցած են Չինաստանի մէջ ՀՀ դեսպանատան աշխատակիցները` հիւպատոս Արտակ Կալաչեանի գլխաւորութեամբ:

Հայ եւ չինացի գիտնականներու զեկոյցները կարեւոր էին հայ-չինական դարաւոր յարաբերութիւններու պատմութեան արժեւորման, Հայաստանի  ու անոր պատմութեան, մեր տարածաշրջանի շուրջ ծաւալուող իրադարձութիւններուն վերաբերեալ, որոնց առնչութեամբ կարեւոր մտքեր փոխանակուեցան եւ ճշգրտումներ կատարուեցան:

Սփիւռքի նախարարութեան աշխատակից Յովհաննէս Ալեքսանեանի  զեկոյցը նուիրուած էր հայ-ռուսական յարաբերութիւններուն եւ այդ ծիրէն ներս ՌԴ հայ համայնքի կարեւոր դերակատարութեան:

«Գիտաժողովի խորագիրը լիովին կը բացայայտէր Հայաստանի նկատմամբ Չինաստանի առանձնակի վերաբերմունքը, մշտապէս կ´ընդգծուէր հայ եւ չին ժողովուրդներու համաշխարհային քաղաքակրթական խորքը: Չինական կողմը հետաքրքրուած է մեր երկրի հետ գիտական, կրթական, տնտեսական ու քաղաքական գործակցութեան հնարաւորութիւններով: Հաստատուած են կապեր, որոնք օգտակար կրնան ըլլալ յետագայ գործակցութեան համար, ներառեալ` չինական սփիւռքի ուսումնասիրման տեսանկիւնէն»,- «Հայերն այսօր»-ի հետ զրոյցին նշած է Յովհաննէս Ալեքսանեան:

Տեղեկանք. Չինաստանի հայ համայնքն արագ զարգացող ու երիտասարդ համայնքներէն է ամբողջ Հարաւ-արեւելեան Ասիոյ մէջ: Տարբեր տուեալներով, ներկայիս Չինաստանի մէջ կը բնակի 800-900 հայ, որոնք կեդրոնացած են հիմնականին մէջ Հոնկքոնկի, Շանհայի, Շէնջենի, Նանկինի, Փեքինի, Հարբինի մէջ: Այստեղ ստեղծուած են եւ կը գործեն  շարք մը կառոյցներ` «Հոնկքոնկի եւ Չինաստանի հայկական համայնքը», «Չնահայ լրագիրը» (http://www.chinahay.com), «Չինաստանի հայկական ուսանողական միութիւնը» եւ այլն:

Այսօր Չինաստանի մէջ աշխատանքային պայմանագրով կ´աշխատի եւ կը սորվին շուրջ 1000 ՀՀ քաղաքացիներ:

 

Scroll Up