Տեղի Ունեցաւ «Ոգեշնչուած Կոմիտասով» ցուցահանդէս-Ձեռնարկը

Էստոնաբնակ արուեստագէտ, Էստոնիոյ միջազգային նկարիչներու միութեան նախագահ Արսէն Քլեանի նախաձեռնութեամբ եւ ՀՀ սփիւռքի նախարարութեան աջակցութեամբ նոյեմբեր 12-ին սփիւռքի նախարարութեան մէջ հայ մեծատաղանդ երաժշտագէտ Կոմիտաս Վարդապետի (Սողոմոն Սողոմոնեան) 150-ամեակին ընդառաջ տեղի ունեցաւ «Ոգեշնչուած կոմիտասով»  խորագիրով ցուցահանդէս-ձեռնարկը:

Ինչպէս կը տեղեկացնէ «Հայերն այսօր»-ը, ներկայացուած են միութեան անդամ հանդիսացող հայաստանաբնակ եւ սփիւռքահայ արուեստագէտներու` Կոմիտասի ստեղծագործութիւններէն ոգեշնչուած աշխատանքները (գեղանկարչութիւն եւ քանդակ):

Ձեռնարկին սկիզբը ցուցադրուած է Կոմիտասի կեանքի եւ գործունէութեան մասին պատմող տեսաֆիլմ, որմէ ետք ողջոյնի խօսքով հանդէս  եկած է Սփիւռքի նախարարութեան Եւրոպայի հայ համայնքներու վարչութեան պետ Կարէն  Աւանէսեան:

Արսէն Քլեան շնորհակալութիւն յայտնելով սփիւռքի նախարարութեան  ձեռնարկի կազմակերպման աջակցելու համար` իր խօսքին մէջ նշած է, որ պատահական չէ նախարարութեան մէջ ցուցահանդէս-ձեռնարկի կազմակերպումը, քանի որ միութեան նպատակն այսպիսի նախաձեռնութիւններով Հայաստանի եւ Սփիւռքի արուեստագէտներուն համախմբելը եւ աշխարհի մակարդակով հայկական կերպարուեստի զարգացման նպաստելն է:

Ապա Արսէն Քլեան հիւրերուն ներկայացուցած է միւս արուեստագէտներ՝ Արամ Դանիէլեանը, (Հայաստան), Լիլիթ Տոնականեանը (Հայաստան), Քրիստինա Օկանեզովա (Հայաստան), Փայլակ Վանիկեանը (Հայաստան), Այսեր Մաթեւոսեանը (Հայաստան), Մաքսիմ Գիքինեանը (Հայաստան), Անդրանիկ Սահակեանը (Հայաստան), Տիգրան Վարդեւանեանը (Հայաստան),  Անուշ Բաբայեանը (Հայաստան), Հերմինէ Նաւասարդեանը (Հայաստան) Աշոտ Թադեւոսեանը (ՌԴ), Անահիտ Քեշիշեանը (Շուէտ), Անի Աւետիսեանը (ՌԴ), որոնց ստեղծագործութիւնները դարձած են «Ոգեշնչուած Կոմիտասով» ցուցահանդէս-ձեռնարկի իրականացման շարժառիթը:

Ձեռնարկի գեղարուեստական մասին մէջ կոմիտասեան կատարումներով ելոյթ  ունեցած են Լիտա Մնացականեան, կիթառահար Էդգար Ենգիբարեան, Երեւանի Կոմիտասի անուան պետական երաժշտանոցի վոկալ բաժնի ասպիրանտ Աննա Կիրակոսեան, Աշտարակի Գուլամերեան Հայորդաց տան «Հայուհիներ»  պարախումբը, «Hi music band»-ը, կոմիտասեան բանաստեղծութիւնները ներկայացուցած են Մեսրոպ Մաշտոցի անուան  մշակոյթի  կեդրոնի սաները եւ ուրիշներ:

 

Scroll Up