Ֆրանսայի Նիմ Քաղաքի Եւ Երեւանի Դպրոցները Դարձան Քոյր Դպրոցներ

ՀՀ սփիւռքի նախարարութեան «Քոյր դպրոցներ» ծրագիրի ծիրէն ներս նոյեմբեր 9-ին Երեւան քաղաքի Դերենիկ Դէմիրճեանի անուան թիւ 27 հիմնական եւ Ֆրանսայի Նիմ քաղաքի հայկական մէկօրեայ դպրոցներուն միջեւ ստորագրուեցաւ համագործակցութեան յուշագիր: Ձեռնարկին ներկայ էին սփիւռքի նախարարութեան, Երեւանի քաղաքապետարանի աշխատակիցներ:

Ինչպէս կը հաղորդէ «Հայերն այսօր»-ը, ՀՀ սփիւռքի նախարարութեան Համահայկական ծրագիրներու վարչութեան գիտակրթական ծրագիրներու բաժինի պետ Հայկ Ենգիբարեան ընթերցելով յուշագիրը` ընդգծեց, որ ծրագիրը հնարաւորութիւն կու տայ համատեղ ուսումնական, կրթական ծրագիրներ իրականացնելու, փոխայցելութիւններ, հայագիտական մրցոյթներ կազմակերպելու, աշակերտներու շփման հնարաւորութիւններ ստեղծելու եւ այլ ձեռնարկներ իրականացնելու:

Ողջունելով ներկաները եւ կարեւոր համարելով յուշագիրի կնքումը` Դերենիկ Դէմիրճեանի անուան թիւ 27 հիմնական դպրոցի տնօրէն Սուսաննա Սարգսեան ներկայացուց դպրոցի պատմութիւնը, անդրադարձաւ դպրոցին մէջ իրականացուող կրթական, մշակութային ծրագիրներուն: Տեսապատկերու միջոցով ցուցադրեց դպրոցի առօրեան:

Ֆրանսայի Նիմ քաղաքի հայկական մէկօրեայ դպրոցի տնօրէն Արմէն Մարտիրոսեան շնորհակալութիւն յայտնելով հիւրընկալութեան համար` նշեց, որ նման ձեռնարկներ շատ օգտակար են իրենց դպրոցին համար: Տնօրէնն ընդգծեց, որ հայապահպանութեան, հայեցի դաստիարակութեան առումով Սփիւռքի մէջ ապրող երեխաներուն համար այնչափ կարեւոր է ծանօթանալ Հայաստան ապրող իրենց հասակակիցներուն հետ:

Երեւանի քաղաքապետարանի աշխատակազմի Հանրակրթութեան վարչութեան գլխաւոր մասնագէտ Սուսաննա Գասպարեան շնորհաւորեց երկու դպրոցներն ու յոյս յայտնեց, որ սկիզբ դրուած բարեկամութիւնը կը խթանէ երկու դպրոցներուն միջեւ կապերու ամրապնդման ու փոխշահաւէտ համագործակցութեան:

Scroll Up