Մխիթար Հայրապետեան Ընդունեց Ալեքքօ Պեզիքեանը

Նոյեմբեր 9-ին սփիւռքի նախարարի պաշտօնակատար Մխիթար Հայրապետեան ընդունեց գործարար, ազգային բարերար Ալեքքօ Պեզիքեանը: Ան ծնունդով Լիբանանէն է, այնտեղ զբաղուած է ազգային-հասարակական աշխոյժ գործունէութեամբ` երկար տարիներ աշխատելով Հայ դատի գրասենեակին մէջ: Մեծանուն սփիւռքահայն արդէն 36 տարի կ´ապրի ու կ´աշխատի Իտալիոյ մէջ:

«Տեսայ, որ Լիբանանի մէջ լաւ այցելութիւններ  ունեցած էք»,-դիմելով Մխիթար Հայրապետեանին` նշեց հիւրն ու աւելցուց, որ Պեզիքեան ընտանիքը Մեծի Տանն Կիլիկիոյ Կաթողիկոսութեան հետ տասնամեակներու բարեկամութիւն ունի:

Խօսելով հայաստանեան ծրագիրներու մասին` Ալեքքօ Պեզիքեան յատկապէս առանձնացուց 2015 թուականին իր եւ իր տիկնոջ բարերարութեամբ Երեւանի մէջ բացուած «Անի Պեզիքեան» երիտասարդական կեդրոնը: Կեդրոնին մէջ կը բնակին մարզերէն մայրաքաղաք կրթութիւն ստացող, սակայն ընկերային  պայմաններէն ելլելով բնակարան վարձակալելու խնդիր ունեցող ուսանողուհիները, եւ թիրախային խումբին մէջ են առաջին հերթին մանկատան սաները: «Միակ պայմանը բարձր առաջադիմութիւնն է: Այսօր փոխուած են երիտասարդ սերունդի մօտեցումները: Կայ կրթութեան արժէքի ընկալումը»,-նշեց բարերարը: Անոր ընտանիքի հովանաւորութեամբ այսօր  բուժում կը ստանան նաեւ քաղցկեղով հիւանդ     բազմաթիւ     մարդիկ,   եւ   բարեգործական     ծրագիրներ    կ´իրականացուին ոչ միայն Հայաստանի, այլեւ սփիւռքի մէջ:

Զրոյցի ընթացքին անդրադարձ կատարուեցաւ սփիւռքի խնդիրներուն, համահայկական հայեցակարգերու անհրաժեշտութեան: «Հիմա Հայաստանի Հանրապետութիւնը եւս  դերակատարութիւն պիտի ստանձնէ աշխատելու սփիւռքեան այն կառոյցներուն հետ, որոնք պետականութեան շահը առաջ կը տանին: Հայաստան` որպէս կապող կամուրջ, շատ թոյլ  եղած է անցեալին: Ոչ ոք իրաւունք ունի խառնուելու համայնքներու ներքին գործերուն, սակայն պիտի մշակուին  քանի մը հայեցակարգեր, որոնց շուրջ պիտի ըլլայ համահայկական-համազգային համաձայնութիւն: Շատ յաճախ անձնական տարաձայնութիւնները պիտի ստորադասուին»,-շեշտեց նախարարի պաշտօնակատարը:

«Ես պիտի աշխատիմ, որովհետեւ մարդիկ կան, որ նեցուկ ունենալու կարիք ունին»,-հանդիպման աւարտին աւելցուց Ալեքքօ Պեզիքեան:

 

 

Scroll Up