Մխիթար Հայրապետեան Յանձնեց Հայաստանի Հանրապետութեան Կառավարութեան Նուէրը Նորվեկիոյ Թագաւորութեան

Նոյեմբեր 6-ին սփիւռքի նախարարութեան մէջ նախարարի պաշտօնակատար Մխիթար Հայրապետեան Հայաստանի Հանրապետութեան մէջ Նորվեկիոյ Թագաւորութեան պատուաւոր հիւպատոս Թիմոթի Տէյվիտ Սթրեյթին յանձնեց ՀՀ կառավարութեան նուէրը Նորվեկիոյ Թագաւորութեան` սփիւռքահայ Դանիէլ Վարուժան Հեճինեանի հեղինակած Ֆրիտեոֆ Նանսենի դիմանկարը:

ՀՀ կառավարութեան եւ մասնաւորապէս սփիւռքի նախարարութեան անունէն ջերմօրէն ողջունելով հիւրերը` սփիւռքի նախարարի պաշտօնակատար Մխիթար Հայրապետեան նշեց. «Այսօրուան ձեռնարկը  ունի խորհրդանշական բնոյթ. մենք սփիւռքի նախարարութիւն  հրաւիրած ենք Հայաստանի Հանրապետութեան մէջ Նորվեկիոյ Թագաւորութեան պատուաւոր հիւպատոսին`  մարդու մը, որուն երկիրն ու ժողովուրդը ողջ հայութեան մօտ կը համարուին որպէս բարեկամ, եւ կը ցանկանք անոր միջոցով Նորվեկիոյ Թագաւորութեան կառավարութեան փոխանցել Հայաստանի Հանրապետութեան կառավարութեան կողմէ փոքր, սակայն մեծ ջերմութիւն, բարեկամութիւն եւ երախտագիտութիւն արտայայտող  նուէր: Հայ-նորվեկական բարեկամութեան ակունքներուն  կանգնած են մասնաւորապէս հայ ժողովուրդի` նորվեկացի մեծ բարեկամ, բեւեռախոյզ, գիտնական, ականաւոր հումանիստ Ֆրիտեոֆ Նանսենը եւ միսիոներ Պոտիլ Կատարինա Պեորնը, որոնք նախորդ դարասկիզբին մեծ աջակցութիւն  ցուցաբերած են հայ ժողովուրդին»:

Մխիթար Հայրապետեան ընդգծեց` Նանսեն առաջիններէն էր, որ դատապարտեց Հայոց ցեղասպանութիւնը, եւ հէնց անոր միջոցով տասնեակ հազարաւոր հայ գաղթականներ կրցան ցեղասպանութենէն փրկուիլ եւ ապաստան գտնել Հայաստանի եւ այլ երկիրներու մէջ, իսկ Պոտիլ-Կատարինա Պեորնը Ցեղասպանութեան տարիներուն որպէս բուժաշխատող Արեւմտեան Հայաստանի մէջ փրկեց հազարաւոր անտուն ու հիւանդ հայ երեխաներու: «Հայ ժողովուրդի համար Ֆրիտեոֆ Նանսենն ու Պոտիլ-Կատարինա Պեորնը կը խորհրդանշեն Նորվեկիան ու նորվեկացիի մեծահոգութիւնը, ինչպէս նաեւ մարդկային բարեսիրութիւնն ու նուիրուածութիւնը մարդու եւ ազգերու իրաւունքներու պաշտպանութեան, եւ հէնց անոնք կը հանդիսանան մեր երկիրներու ու ժողովուրդներու յարաբերութիւնները սնուցող առաջին ամենամեծ աղբիւրը»,-շեշտեց նախարարի պաշտօնակատարը:

Մխիթար Հայրապետեան խօսեցաւ նաեւ 1988թ. երկրաշարժէն յետոյ աղէտի գօտիի վերականգնման գործընթացին Նորվեկիոյ կառավարութեան եւ ժողովուրդի աջակցութեան մասին: «Նորվեկիոյ Թագաւորութեան կառավարութեան նուէրը Ֆրիտեոֆ Նանսենի դիմանկարն է` «Նանսեն, կամուրջը բարեկամութեան եւ խաղաղութեան» անուամբ, որուն հեղինակն է պոսթընաբնակ յայտնի նկարիչ Դանիէլ Վարուժան Հեճինեան, որ Պոսթընէն յատուկ ժամանած է Հայաստան` ներկայ գտնուելու այս կարեւոր ձեռնարկին: Նկարը կ´արտայայտէ հայ եւ նորվեկացի ժողովուրդներու բարեկամութիւնը, որմով Հայաստանը եւ հայ ժողովուրդն իրենց երախտագիտութիւնը կը յայտնեն մեծ մարդասէր Ֆրիտեոֆ Նանսենին` հայ ազգին ցուցաբերած անձնուէր վերաբերմունքին, սրտցաւութեան եւ անգնահատելի աջակցութեան համար, ինչպէս նաեւ Նորվեկիոյ իշխանութիւններուն եւ Նորվեկիոյ ժողովուրդին` 1988թ.-ի երկրաշարժի ժամանակ եւ յետոյ Հայաստանին մարդասիրական մեծ օգնութիւն ցուցաբերելու համար»,-ամփոփեց նախարարի պաշտօնակատարը` աւելցնելով, որ պարոն Հեճինեան նկարի կրկնօրինակը նուիրած է սփիւռքի նախարարութեան:

ՀՀ Արտաքին Գործոց Նախարար Զոհրաբ Մնացականեանի Ողջոյնի Խօսքը Փոխանցեց ԱԳՆ Եւրոպայի Վարչութեան  Պետ Գագիկ  Ղալաչեան:

Նորվեկիոյ Թագաւորութեան պատուաւոր հիւպատոս Թիմոթի Տէյվիտ Սթրէյթին նախաձեռնութեան համար շնորհակալութիւն յայտնեց ՀՀ կառավարութեան, սփիւռքի նախարարութեան` նշելով, որ արուեստի այս գործը ֆանտաստիկ նուէր է Նորվեկիոյ Թագաւորութեան: Տէյվիտ Սթրէյթին նաեւ յոյս յայտնեց, որ երկու պետութիւններու բարեկամական յարաբերութիւնները առաւել կը սերտանան եւ կը զարգանան:

Նկարի հեղիակ Դանիէլ Վարուժան Հեճինեան ներկայացուց դիմանկարի ստեղծման պատմութիւնը, ուր Հայաստանի եւ Նորվեկիոյ դրօշները կը խորհրդանշեն երկու ազգերու բարեկամութիւնը, ետեւը Արարատ լեռն է, եւ պատկերի կեդրոնին մեծ մարդասէր Ֆրիտեոֆ Նանսենն է` ձեռքին խաղաղութեան խորհրդանիշ աղաւնին: Շնորհակալութիւն յայտնելով սփիւռքի նախարարի պաշտօնակատար Մխիթար Հայրապետեանին` արուեստագէտը նշեց, որ սփիւռքի մէջ ապրող հայ երիտասարդներուն  Հայաստանի ամենաերիտասարդ նախարարը կարող է ոգեշնչել եւ ուղեցոյց դառնալ Հայաստան գալու եւ այստեղ հաստատուելու համար:

Ելոյթ ունեցաւ նաեւ Լոռիի մարզպետ Անտրէ Ղուկասեան: «Ուրախ եմ,  որ որպէս Լոռիի մարզպետ պատիւ ունիմ այսօր մասնակցելու այս կարեւոր ձեռնարկին, որ եւս մէկ առիթ է վերհաստատելու մեր երկիրներու` Հայաստանի եւ Նորվեկիոյ Թագաւորութեան միջեւ առկայ ամուր, գործընկերային յարաբերութիւնները: Երկրաշարժէն կարճ ժամանակ անց Լոռիի մարզի Սպիտակ քաղաքին մէջ տեղակայուեցան Նորվեկական Կարմիր խաչի վրանները, որոնք դարձան երկրաշարժէն տուժածներուն առաջին բուժօգնութիւն ցուցաբերող գործնական կէտերէն մէկը: Աւելի ուշ` 1989թուականի մարտին Նորվեկական Կարմիր խաչի կողմէ կառուցուեցաւ ու շահագործման  յանձնուեցաւ Սպիտակի հիւանդանոցն իր յարակից կառոյցներով: Այսօր, երկրաշարժի  30-րդ տարելիցին ընդառաջ հայ ժողովուրդի ու մասնաւորապէս բոլոր լոռեցիներու անունով կը յայտնեմ մեր երախտագիտութիւնը`  դժուարին իրավիճակի մէջ յայտնուած Հայաստանին աջակցելու համար»,-նշեց Լոռիի մարզպետը:

Ձեռնարկին ներկայ էին նաեւ ՀՀ-ի մէջ Դանիայի թագաւորութեան արտակարգ եւ լիազօր դեսպան Ռուբէն Մադսեն, Շուէտի Թագաւորութեան արտակարգ եւ լիազօր դեսպան Ուլրիկ Տիդեստրեոմը,  Ֆինլանտիայ հանրապետութեան դեսպան Արիա Մակկոնեն եւ Հայաստանի մէջ Շուէտի դեսպանութեան գործերու ժամանակաւոր հաւատարմատար Մարտին Ֆրեդրիկսոնը:

Scroll Up