Մխիթար Հայրապետեան Ընդունեց Հոլանտահայ Կազմակերպութիւններու Ընկերակցութեան Նախագահը

Նոյեմբեր 5-ին սփիւռքի նախարարի պաշտօնակատար Մխիթար Հայրապետեան ընդունեց Հոլանտահայ կազմակերպութիւններու ընկերակցութեան նախագահ, «Աբովեան» մշակութային միութեան ղեկավար Մաթօ Հախվերտեանը:

Շնորհակալութիւն յայտնելով ընդունելութեան համար` Մաթօ Հախվերտեան նշեց, որ այսօր Հոլանտայի մէջ կ´ապրի 20-25.000 հայ, եւ անոնց զգալի մասը վերջին տարիներուն Հայաստանէն արտագաղթածներ են, կան նաեւ իրաքահայեր եւ սուրիահայեր: «Հայերն աշխատասէր են, կ´աշխատին, աշխոյժ կը մասնակցին Հոլանտայի տնտեսական ծրագիրներուն, յաջողութիւններ կը գրանցեն կրթութեան ոլորտին մէջ: Միեւնոյն ժամանակ անոնք կապուած են Հայաստանի հետ, կը սիրեն իրենց հայրենիքը»,-նշեց հիւրը:

Մաթօ Հախվերտեան ընդգծեց, որ կարեւոր կը համարեն  Հայաստանի մէջ Նիտերլանտներու Թագաւորութեան դիւանագիտական ներկայացուցչութեան անհրաժշետութիւնը եւ կը փորձեն բանակցիլ տեղի կառավարութեան հետ այդ հարցը լուծելու համար: Մխիթար Հայրապետեան շեշտեց, որ սփիւռքի նախարարութիւնը պատրաստ է հայ համայնքին համար ընել հնարաւոր ամէն բան:

«Այսօր մենք կը գործակցինք սփիւռքի հետ փոխադարձութեան սկզբունքով. եւ՛ Հայաստան պիտի աջակցի սփիւռքին, եւ՛ սփիւռքը` Հայաստանին: Հայապահպանութեան գործընթացքին բացի տարաբնոյթ ձեռնարկներու կազմակերպումէն` սփիւռքին հզօր ազդակ կրնայ ըլլալ ուժեղ Հայաստան պետութեան առկայութիւնը, որ հպարտութիւն կը դառնայ անոնց համար: Եթէ ըլլայ հայ ըլլալու հպարտութիւնը, դուրսը ապրող հայը կը ցանկայ մնալ հայ: Մենք պէտք է փոխադարձ պատասխանատուութեամբ առաջ երթանք ու հոգ տանինք իրար»,-նշեց նախարարի պաշտօնակատարը:

Մխիթար Հայրապետեան կարեւոր համարեց նաեւ համահայկական շահերու շուրջ միասնականութեան գաղափարը: Ըստ անոր` կան քանի մը հայեցակարգեր, որոնց համար պէտք է մէկ ճակատով պայքարիլ, եւ հէնց Հայաստանի Հանրապետութիւնը պէտք է այդ ուղերձները յղէ սփիւռքին: Մաթօ Հախվերտեան անդրադարձաւ նախարարութեան «Քայլ դէպի տուն» ծրագիրին` նշելով, որ միայն դրական կարծիքներ  լսած է ծրագիրին մասին եւ պատրաստ է յաջորդ տարի աջակցիլ ծրագիրի իրականացման աշխատանքներուն:

Մխիթար Հայրապետեան աւելցուց, որ կարեւոր կը համարէ ծրագիրի բովանդակային փոփոխութիւնները եւ շարունակականութիւնը, եւ այսօր արդէն ՀԲԸՄ Հայկական վիրտուալ համալսարանին հետ համագործակցութեան շնորհիւ մասնակիցները հնարաւորութիւն ունին առցանց  դասընթացներու միջոցով շարունակել իրենց ուսումը:

Հանդիպման աւարտին Հոլանտահայ կազմակերպութիւններու ընկերակցութեան նախագահը նշեց, որ ընկերակցութիւնը կը պատրաստուի նշել Երեւանի հիմնադրման 2800-ամեակը եւ Սպիտակի երկրաշարժի 30-րդ տարելիցը, եւ ձեռնարկներու, ցուցահանդէսներու բովանդակային մասը կազմելու համար անհրաժեշտ է սփիւռքի նախարարութեան աջակցութիւնը:

 

 

Scroll Up