Հայրենադարձութեան Եւ Աշխատանքային Ներգաղթեալներու Խնդիրները` Համաշխարհային Դրամատան Առաքելութեան Ուշադրութեան Կեդրոնին ՄԷջ

Համաշխարհային դրամատան սոցիալական պաշտպանութեան ու աշխատատեղերուն ուղղուած արուեստագիտական աջակցութեան առաքելութեան աշխատակիցներու` անձնակազմի ղեկավար Մատալենա Հոնորատիի, խորհրդատու Մելիսա Սումայետա Աուրասոնի, աւագ տնտեսագէտ Սունհա Եի եւ ՀՀ սփիւռքի նախարարութեան ԱՊՀ վարչութեան պետի պաշտօնակատար Էտկար Յովսէփեանի, Հայրենադարձութեան եւ հետազօտութիւններու վարչութեան Հայրենադարձութեան բաժնի պետ Յովհաննէս Ալեքսանեանի մասնակցութեամբ սփիւռքի նախարարութեան մէջ տեղի ունեցաւ հանդիպում-քննարկում:
Նպատակն էր հասկնալ հայ գաղթականներու առանցքային խնդիրներն ԱՊՀ տարածքին մէջ, անոնց աշխատանքի ու վերադարձի, երկիր ուղարկուող փոխանցումներու ու ատոնց ազդեցութեան վերաբերող հարցերը: Հիւրերու համար կարեւորութիւն կը ներկայացնէին Սփիւռքի նախարարութեան կողմէ իրականացուող հայրենակիցներու աջակցութեան, խորհրդատուութեան, սփիւռքեան համայնքներու հետ կապի ծրագիրներն ու գործողութիւնները, հայրենադարձութեան քաղաքականութեան միջոցները, թիրախային խումբերը, սփիւռքի հայկական ներուժի մասնակցութիւնը երկրի զարգացման գործին մէջ, ինչպէս նաեւ առկայ մարտահրաւէրները:
Այցի արդիւնքներով Համաշխարհային դրամատան առաքելութեան անձնակազմը կը նախատեսէ պատրաստել զեկոյց` յետագայ արուետագիտական աջակցութեան իրականացման եւ ատոր ժամկէտներու շուրջ:

Scroll Up