Մխիթար Հայրապետեան Ընդունեց Լաս Վէկասի Մէջ ՀՀ Պատուաւոր Հիւպատոս Ատրուշան (Էնտի) Արմէնեանը

Հոկտեմբեր 31-ին սփիւռքի նախարարի պաշտօնակատար Մխիթար Հայրապետեան ընդունեց Լաս Վէկասի մէջ ՀՀ պատուաւոր հիւպատոս Ատրուշան (Էնտի) Արմէնեանը:

Ողջունելով հիւրը` Մխիթար Հայրապետեան բարձր գնահատեց պատուաւոր հիւպատոսի` Նեւատա նահանգին մէջ հայկական մշակոյթի զարգացման, պատմութեան եւ ժառանգութեան պահպանման, հայ համայնքի շահերու ներկայացման ուղղուած ջանքերը:

Արմէնեան միշտ կապուած եղած է հայկական արմատներուն, մեծապէս նպաստած  Նեւատա նահանգին մէջ Հայ Առաքելական առաջին եկեղեցւոյ կառուցման:

Շնորհակալութիւն յայտնելով ընդունելութեան համար` Ատրուշան Արմէնեան նշեց, որ Լաս Վէկասի մէջ կը գործեն երկու մէկօրեայ հայկական դպրոցներ, որոնցմէ իւրաքանչիւրին մէջ կը յաճախէ մօտաւորապէս 60 աշակերտ:

Շեշտելով, որ տեղի հայ համայնքը կ´ընդլայնուի` այսօր ընդգրկելով արդէն 15-20 հազար հայ, Մխիթար Հայրապետեան առաջարկեց լրջօրէն մտածել նաեւ ամէնօրեայ դպրոցի հիմնման մասին, որ մեծապէս կը նպաստէ համայնքին մէջ հայապահպանութեան աշխատանքերու արդիւնաւէտութեան բարձրացման: Նախարարի պաշտօնակատարն ընդգծեց նաեւ, որ համայնքային հետաքրքրութեան եւ անհրաժեշտութեան պարագային եւ՛ սփիւռքի, եւ՛ կրթութեան եւ գիտութեան նախարարութիւնները պատրաստ են հնարաւորինս աջակցելու: Պայմանաւորուածութիւն ձեռք բերուեցաւ յառաջիկային տեսակապի միջոցով առաւել մանրամասն քննարկել առաջարկը:

Հանդիպման ընթացքին անդրադարձ կատարուեցաւ նաեւ ամերիկահայ Տենի Թարխանեանի` ԱՄՆ Քոնկրէսի ընտրութիւններուն մասնակցութեան: Թարխանեան առաջադրուած է  հարազատ Նեւատա նահանգին մէջ: Այս առումով Մխիթար Հայրապետեան կոչ ըրաւ նեւատահայութեան ըլլալ միասնական ու համախմբուիլ համահայկական շահերուն շուրջ:

 

 

Scroll Up