Հ Հ Սփիւռքի Նախարար Մխիթար Հայրապետեանը Դամասկոսի Մէջ

Հինգշաբթի, 20 Սեպտեմբեր 2018-ին, յատուկ առաքելութեամբ Դամասկոս այցելեց Հայաստանի Հանրապետութեան Սփիւռքի Նախարար՝ տիար Մխիթար Հայրապետեանը:

Պարոն Նախարարը նախ առանձնազրոյց ունեցաւ Դամասկոսի Թեմի Առաջնորդ՝ Գերշ. Տ. Արմաշ Եպս. Նալպանտեանին հետ եւ ապա Սուրբ Սարգիս Եկեղեցւոյ մէջ ժողովրդային հանդիպում ունեցաւ Դամասկահայութեան հետ: Հանդիպման ներկայ էին Դամասկոաի Հայ Կաթողիկէ Առաջնորդ՝ Արհ. Տ. Յովսէփ Եպս. Առնաութեանը, Սուրիոյ մէջ Հ Հ Արտակարգ եւ Լիազօր Դեսպան՝ Տոքթ. Փրոֆ. Արշակ Փօլատեանը, Ազգ. Գաւառական Ժողովի Ատենապետ՝ Տիար Թագւոր Պօյաճեանը, Սուրիոյ Ժողովրդային Ժողովի (Խորհրդարան) Երեսփոխան եւ Հայ-Սուրիական Խորհրդարանական Բարեկամական Յանձնաժողովի Նախագահ՝ Տոքթ. Նորա Արիսեանը, ՍԴՀԿ Կենտրոնական Վարչութեան Փոխատենապետ՝ Տոքթ. Վազգէն Համալեանը, Դամասկահայ կազմակերպութիւններու եւ մշակութային ու բարեսիրական միութիւններու ներկայացուցիչներ եւ դամասկահայեր:

Հանդիպման սկզբին Առաջնորդ Տ. Արմաշ Սրբազանը նախ ողջունեց հայրենիքէն ժամանած պատուաւոր հիւրը բարի գալուստ մաղթելով իրեն: Սրբազանը նշեց նաեւ թէ «Հ Հ Անկախութեան 27-րդ տարեդարձը այս տարի կ’արժեւորուի իւրայատուկ ուրախութեամբ եւ տօնականութեամբ մեր մէջ ունենալով Հայաստանի Հանրապետութեան Սփիւռքի Նախարար Մխիթար Հայրապետեանը»: Ապա Նախարարը ողջունեց ներկաները եւ իր երախտագիտութիւնը յայտնեց ջերմ ընդունելութեան համար: Որմէ ետք պատասխանեց Դամասկահայութեան յուզող հարցերուն: հանդիպումը աւարտեցաւ Գերպայծառ Յովսէփ Եպիսկոպոսի պահպանիչ աղօթքով:

Յուրախութիւն բոլորին հանդիպման աւարտին, Հայաստանի ազգային օրհներգ «Մեր Հայրենիք»-ի միասնական երգեցողութեամբ ներկաները իրար շնորհաւորեցին Հ Հ Անկախութեան 27-րդ տարեդարձին առթիւ:

Դիւան Ազգ. Առաջնորդարան
Դամասկոս 21 Սեպտեմբեր 2018

Scroll Up