Ամերիկահայ Արագավազորդը Ցանկութիւն Յայտնած Է Հանդէս Գալու Մարզախաղերու Հայաստանի Ազգային Հաւաքականին Մէջ

ՀՀ մարմնակրթութեան եւ երիտասարդութեան հարցերու նախարարն ընդունած է ամերիկահայ արագավազորդ Ալեքսան Տոնիկեանը, որ ցանկութիւն  յայտնած է հանդէս գալու մարզախաղերու Հայաստանի Հանրապետութեան ազգային հաւաքականի կազմին մէջ:

Ինչպէս «Հայերն այսօր»-ին կը յայտնեն ՀՀ մարմնամարզութեան եւ երիտասարդութեան հարցերու նախարարութենէն, նախարարը ողջունած է մարզիկը եւ նշած, որ իւրաքանչիւր հայ, աշխարհի որ երկրին մէջ  բնակի, պէտք է իր հնարաւորութիւններու, մասնագիտական հմտութիւններու, գիտելիքներու սահմաններուն մէջ ծառայէ մեր հայրենիքի` Հայաստանի Հանրապետութեան վարկանիշի եւ ճանաչելիութեան բարձրացման ու հանրահռչակման: «Կը կարծեմ` այն բանի գիտակցումը, որ յաղթանակէն յետոյ պիտի ծածանի հայոց եռագոյնը, կ’ոգեւորէ Ձեզ` հասնելու աւելի մեծ մարզական յաջողութիւններու»,- ըսած է Լ. Վահրադեան:

Ալեքսան Տոնիկեան շնորհակալութիւն  յայտնած է ջերմ ընդունելութեան համար եւ հաւաստիացուցած, որ պիտի ընէ առաւելագոյնը` միջազգային մրցահարթակներու վրայ  Հայաստանի պատիւը բարձր պահելու համար:

Հանդիպման ներկայ Հայաստանի մարմնամարզութեան ընկերակցութեան նախագահ Ռոբերտ Էմմիյեան ընդգծած է, որ Ա. Տոնիկեան հեռանկարային մարզիկ է եւ շնորհակալութիւն  յայտնած  նախարարին` Հայաստանի Հանրապետութեան քաղաքացիութիւն ստանալու հարցին Տոնիկեանին աջակցելու համար:

 

Scroll Up