Սուրիոյ Մշակոյթի Նախարարութիւնը Պատուած Է Նորա Արիսեանի Գործերը

Դամասկոսի Տումմար մշակութային համալիրին մէջ տեղի ունեցած է յատուկ ձեռնարկ, ուր Սուրիոյ մշակոյթի նախարարութիւնը «Լուսամուտներ» նախաձեռնութեան ծիրէն ներս պատուած է Նորա Արիսեանի գիտական եւ թարգմանական գործերը:

Ինչպէս կը հաղորդէ «Հայերն այսօր»-ը, «Լուսամուտներ» նախաձեռնութեան հիմնադիր Իտրիս Մուրատը ներկայացուցած է Արիսեանի կատարած մեծ ներդրումը սուրիական եւ հայկական մշակութային ոլորտին մէջ:

Իր խօսքին մէջ Նորա Արիսեան շնորհակալութիւն  յայտնած է նման ձեռնարկի կազմակերպիչներուն` անդրադառնալով սուրիական գրականութեան ոլորտին մէջ եւ Ցեղասպանութեան հարցին մէջ իր կատարած աշխատանքներուն:

Սուրիոյ մշակոյթի նախարարութեան Թարգմանութեան բաժինի տնօրէն Հուսամ Խատուրը ներկայացուցած է Արիսեանի թարգմանական աշխատանքը, անոր լեզուական եւ թարգմանական կարողութիւնները եւ բազմալեզու թարգմանութիւն կատարելու կարելիութունը` այն համարելով եզակի երեւոյթ, որ արժանի է մեծարանքի:

Խատուրը նաեւ շեշտած է, որ Սուրիոյ խորհրդարանին մէջ Արիսեան կը ներկայացնէ նաեւ գրողներու եւ թարգմանիչներու խնդիրները:

 

 

Scroll Up