Մխիթարեան Միաբանութեան Ս. Ղազար Հաստատուելուն Երեքհարիւարմեակի Հանդիսութիւններու Փակում

Մխիթարեան Միաբանութեան Ս. Ղազար կղզի մուտք գործելուն երեքհարիւրամեակի յոբելինական տարին՝ որուն ընթացքին տեղի ունեցան ծիսական եւ մշակութային տարբեր հանդիսութիւններ իր աւարտին հասաւ Շաբաթ 8 եւ կիրակի 9 սեպտեմբեր 2018ի տօնախմբութեամբ։

8 Սեպտեմբեր Աստուածածնի ծննդեան տօնին օրը, յիշատակումն է թէ Մխիթարեան միաբանութեան հիմնարկութեան, թէ Աստուածամօր ընծայման, եւ թէ՛ Մխիթար Աբբահօր եւ իր վանականներու Ս. Ղազար կղզի մուտք գործելուն։

Շաբաթ 8 Սեպտեմբեր, Ս. Ղազար եկեղեցւոյ մէջ Տիրամօր Ծննդեան տօնին՝ Ս. եւ անմահ պատարագ մատուցանեց Հ. Համազասպ վրդ. Քէշիշեան, նախագահութեամբ՝ Պոլսոյ թեմի առաջնորդ եւ Մխիթարեան Միաբանութեան պապական պատուիրակ՝ Գերշ. Լեւոն Արք. Զէքիեանի, որ յաւուր պատշաճի քարոզին մէջ արժանապէս յիշեց Մխիթարի հոգեւոր եւ մշակութային առաքելութիւնը եւ նպաստը ըլլա՛յ Հայ ժողովուրդին եւ թէ համայն մարդկութեան, ինչպէս նաեւ իր հաստատած խոր ու բեղուն կապը Վենետիկ քաղաքին հետ։

Յետ միջօրէին, կայացաւ Յակոբ Փափազեանի Գիրք Հայրենիք ֆիլմաշարքի «Մխիթար Սեբաստացի» վաւերագրական ֆիլմի ցուցադրութիւնը, որ արժանացաւ ներկաներուն մեծ գնահատանքին։

Երեկոյեան, տեղի ունեցաւ գեղարուեստական յայտագիր. «Հացին երգը. Կոմիտաս եւ Վարուժան. Երաժշտութիւն, բանաստեղծութիւն եւ հոգեկանութիւն» La paix (խաղաղութիւն) համոյթի կատարողութեամբ (Արամ Իփեքճեան, Սիլվիա Տէ Ռօսսոյ, ֆլավիոյ Սփոթթի, եւ ասմունքող՝ Կապրիելէ Փարիլլոյ)։

Կիրակի 9 Սեպտեմբեր, Վենետիկի Պատրիարք՝ Գերապայծառ Ֆրանչեսքոյ Մորալիա, Ս. եւ անմահ պատարագ մատուցանեց։ Քարոզին մէջ  Պատրիարքը  շեշտեց Հայ Եկեղեցւոյ հոգեկանութեան իւրայատկութիւնը, ինչպէս նաեւ Մխիթարեան Միաբանութեան Վենետիկի մէջ ներկայութեան կարեւորութիւնը, որպէս կենդանի  վկայութիւն Վենետիկ քաղաքի արեւելքի եւ արեւմուտքի մշակութային զօդի ամրապնդման։

Scroll Up