Հայաստանի Մխիթարեան Կեդրոնի Տնօրէնն Այցելեց Սփիւռքի Նախարարութիւն

Սեպտեմբեր 11-ին ՀՀ սփիւռքի նախարար Մխիթար Հայրապետեան ընդունեց Հայաստանի Մխիթարեան կեդրոնի տնօրէն Հայր Եղիա վարդապետ Քիլաղպեանը եւ վարժարանի փոխտնօրէն Հայր Գէորգ վարդապետ Սարգիսեանը:

 Նախարարը հետաքրքրուեցաւ կեդրոնի գործունէութեամբ, յաջողութիւններով ու խնդիրներով: «Մենք պատրաստ ենք համակողմանի աջակցութիւն ցուցաբերելու ձեր բոլոր նախաձեռնութիւններուն ու ծրագիրներուն: Մշտապէս կապի մէջ եղէք նախարարութեան հետ, մասնակցէք մեր ծրագիրներուն», – աւելցուց ան:

Հայր Եղիա վարդապետ Քիլաղպեան ներկայացուց կեդրոնի աշխատանքները, կրթական եւ այլ հարցերու վերաբերեալ իր մտահոգութիւններն ու ընելիքները, պատմեց սահմանամերձ Չորաթան գիւղի մէջ բացուած փոքրիկ կեդրոնի մասին, ուր կը յաճախեն գիւղի բոլոր երեխաները : Կը դասաւանդուի լեզու, երգ, պար, ճատրակ, ասեղնագործութիւն եւ այլն:

 Զրոյցի ընթացքին քննարկուեցան յետագայ համագործակցութեան ուղղութիւններն ու հեռանկարները:

Մինչեւ Մխիթարեան միաբանութեան հիմնադրումը Մխիթար Սեբաստացին դպրոցներ  բացած է տարբեր հայաբնակ քաղաքներու մէջ: Աշխարհի տարբեր մասերու մէջ 1736 թուականէն մինչ մեր օրերը գործած է շուրջ 30 Մխիթարեան վարժարան:

1990-ական թուականներու սկիզբը Վիեննայի Մխիթարեաններու միաբանութիւնը վարձակալութեան հիմունքով Հայաստանի Հանրապետութեան դեսպանութեան տրամադրած է մասնաշէնք եւ ատոր դիմաց Հայաստանի Հանրապետութեան մէջ ստանցած հողակտոր եւ շինութիւն` Աւան համայնքին մէջ վարժարան հիմնելու նպատակով: 1994 թ. Երեւանի մէջ բացուած է Մխիթարեաններու կեդրոնը, ուր կը գործէ ժառանգաւորաց դպրոց, կայ նաեւ մատուռ եւ գրադարան:

Scroll Up