ՀՄԸՄ-ի Հիմնադրման 100-ամեակին Նուիրուած Ձեռնարկ Պուլկարիոյ ՄԷջ

Սեպտեմբեր 8-ին Պուլկարիոյ  Փլովտիւ քաղաքի Սուրբ Գէորգ հայկական եկեղեցւոյ բակին մէջ տեղի ունեցաւ Հայ մարմնակրթական ընդհանուր միութեան (ՀՄԸՄ) հիմնադրման 100-ամեակին նուիրուած ձեռնարկ, որ կազմակերպած էին ՀՄԸՄ Պուլկարիոյ շրջանային վարչութիւնը եւ Փլովտիւի մասնաճիւղը: Ձեռնարկին մասնակցեցան Սոֆիայի, Փլովտիւի, Վառնայի, Պուրկասի, Ռուսէի եւ Շումենի ՀՄԸՄ մասնաճիւղերու ու սկաուտական խումբերու անդամներ, սկաուտական շարժման վեթերաններ, հայ համայնքային կազմակերպութիւններու բազմաթիւ ներկայացուցիչներ:

Ինչպէս «Հայերն այսօր»-ին կը յայտնեն ԱԳՆ մամլոյ ծառայութենէն, Պուլկարիոյ մէջ ՀՀ դեսպան Արմէն Սարգսեան իր շնորհաւորական խօսքին մէջ նշեց, որ անցած հարիւր տարիներուն ընթացքին ՀՄԸՄ-ը մեծ վստահութիւն ու յարգանք  ձեռք բերած է Սփիւռքի եւ Հայաստանի մէջ` իր հայապահպան գործունէութեան եւ երիտասարդութեան համախմբման բնագաւառին մէջ ունեցած հսկայական աւանդի համար:

Տեղի ունեցաւ սկաուտական խումբերու շքերթ, որմէ յետոյ կայացաւ փոքրիկ սկաուտներու երդման հանդիսաւոր արարողութիւն` քահանայ Հրաչ Մուրատեանի օրհնութեամբ:

Այնուհետեւ հանդիսութիւնը շարունակուեցաւ տօնական սեղաններու շուրջ` հայկական երգ ու պարի ներքոյ:

Ձեռնարկի ծիրէն ներս կազմակերպուած էր հայ գործարարներու եւ անհատներու կողմէ պատրաստուած յուշանուէրներու, հրուշակեղէնի տօնավաճառ:

 

Scroll Up