Սուրիոյ Վարչապետն Այցելած Է Հայաստանի Տաղաւար

Դամասկոսի 60-րդ միջազգային ցուցահանդէսի բացումին Սուրիոյ վարչապետ Իմատ Խամիսն այցելած է Հայաստանի տաղաւար: Վարչապետը ընդունած է Սուրիոյ մէջ Հայաստանի դեսպան Արշակ Փոլադեանը:

Ինչպէս «Հայերն այսօր»-ին կը  յայտնեն «Բիզնես Արմէնիա»-ի Հանրային կապերու ծառայութենէն, «Բիզնես Արմէնիա»-ի աջակցութեամբ սեպտեմբեր 6-15 Հայաստան միասնական տաղաւարով կը մասնակցի Դամասկոսի 60-րդ միջազգային ցուցահանդէսին: Հայկական տաղաւարին մէջ ներկայացուած են մեքենաշինութեան, շինանիւթերու արտադրութեան, դեղագործութեան, սննդարդիւնաբերութեան ոլորտներու 33 ընկերութիւններու արտադրանքի նմուշներ ու ցանկեր:

Սուրիոյ վարչապետ Իմատ Խամիսը ողջունած է բարեկամ Հայաստանի մասնակցութիւնը` յոյս յայտնելով, որ էքսպոն նոր խթան կ՛ըլլայ հայ-սուրիական առեւտրատնտեսական համագործակցութեան խորացման համար: Դեսպան Արշակ Փոլադեան նշած է, որ մեր երկրի արտադրողները պատրաստ են առաւելագոյն ջանքեր գործադրելու փոխշահաւէտ համագործակցութեան համար:

Հայաստան պարգեւատրուած է մասնակցութեան համար: Պարգեւը դեսպան Արշակ Փոլադեանին  յանձնած է Սուրիոյ տնտեսութեան նախարար Մոհամմատ Սամեր ալ-Խալիլը:

Հայկական տաղաւարը վաճառքի գործակալներու եւ խոշոր գնորդ-այցելուներու ուշադրութեան կեդրոնին  է, որոնք հիմնականին մէջ հետաքրքրուած են սննդամթերքով, շինանիւթերով, վերականգնուող ուժանիւթի բնագաւառին մէջ հայաստանեան ընկերութիւններու առաջարկներով: Հաշուի առնելով ուժանիւթի արեւային համակարգերու նկատմամբ մեծ հետաքրքութիւնը, սեպտեմբեր 12-ին հայկական տաղաւարին մէջ տեղի կ’ունենայ շնորհանդէս, որուն ընթացքին «Շտիգեն» ընկերութեան տնօրէն Հայկ Շէկեան կը ներկայացնէ արտադրանքը, հզօրութիւնները, մրցունակութիւնը, արտահանման ներուժը:

Դամասկոսի 60-րդ միջազգային ցուցահանդէսին կը մասնակցի 1700 ընկերութիւն` 48 երկրէ:

Scroll Up