Գրասնոյարսկի «Արմենիա» Պարախումբի Համերգները Հայաստանի ՄԷջ

Այս ամառ Հայաստան ժամանեց Ռուսաստանի Դաշնութեան Գրասնոյարսկի երկրամասի Գրասնոյարսկ քաղաքի «Արմենիա» ժողովրդական պարախումբը: Խումբը մասնակցեցաւ Աբովեան եւ Դիլիջան քաղաքներուն մէջ իրականացուող փառատօններուն, ինչպէս նաեւ Սփիւռքի նախարարութեան կողմէ կազմակերպուած «Սփիւռքի հայ համայնքներու պարախումբեր» համերգին, որ կայացաւ յուլիս 13-ին` Հ. Պարոնեանի անուան երաժշտական երգիծական  պետական թատրոնին մէջ, ուր Սփիւռքի նախարար Մխիթար Հայրապետեանի կողմէ արժանացաւ պատուոգիրի:

Ինչպէս «Հայերն այսօր»-ին կը  յայտնեն պարախումբէն, այս շրջագայութեան շնորհիւ 50-է աւելի պատանիներ եւ երիտասարդներ, որոնցմէ շատերն առաջին անգամ  եկած էին հայրենիք, ծանօթացան Հայաստանի պատմութեան եւ մշակոյթին: Սփիւռքի նախարար Մխիթար Հայրապետեանի կողմէ խումբն իր ողջ կազմով հրաւիրուեցաւ նախարարութիւն, ուր կայացաւ նախարարի հետ հանդիպումը եւ քննարկուեցաւ յետագայ համատեղ ծրագիրները:

Երեւանի Ստանիսլաւսկիի անուան ռուսական տրամադիկական թատրոնին մէջ յուլիս 21-ին տեղի ունեցաւ «Արմենիա» պարախումբի մենահամերգը: Երեկոն կը վարէր բոլորին կողմէ ճանչցուած դերասան եւ հաղորդավար Սարգիս Նաջարեան: Հիւրերուն շարքին  էին ՀՀ սփիւռքի եւ մշակոյթի նախարարութիւններու ներկայացուցիչներ:

«Արմենիա» պարախումբն իր ստեղծագործական գործունէութիւնը սկսած է 2000 թուականին` Ռոբերտ Ասատրեանի ղեկավարութեամբ: 2009 թուականին ստացած է Ժողովրդական կոչում: Խումբի` 2010 թուականին կայացած յոբելենական համերգին ժամանակ «Արմենիա» պարախումբը պարգեւատրուած է Սփիւռքի նախարարութեան «Պօղոս Նուբար» մետալով` Սփիւռքի մէջ հայկական մշակոյթի պահպանման եւ զարգացման  համար:

2011 թուականէն պարախումբը կը ղեկավարեն Գէորգի Մելքոնեան եւ Արփինէ Ասատրեան: Փորձառու ղեկավարներու շնորհիւ խումբն ունի մօտ 180 աշակերտ` 7 տարբեր տարիքային խումբերէ բաղկացած, 50 եւ աւելի պարային բեմադրութիւններ: Այս տարիներուն ընթացքին «Արմենիա» պարախումբը մասնակցած է բազմաթիւ միջազգային մրցոյթ-փառատօններու` Անապա (2012թ), Նովոսիբիրսկ (2015թ), Աստանա (2017թ), Գրասնոյարսկ (2011-2018թթ), Սոչի (2018թ) քաղաքներուն մէջ` գրաւելով ամենաբարձր հորիզոնականները:

2017թ ապրիլին Մոսկուայի մէջ կայացաւ «Հայորդիք» միջազգային մրցոյթ-փառատօնը, որուն կը մասնակցէին ՌԴ տարբեր քաղաքներու պարախումբեր: Ժիւրիի կազմին մէջ էին Հայաստանի պարարուեստի եւ մշակոյթի յայտնի գործիչներ` Արա Գէորգեան, Գագիկ Գինոսեան, Ռուդիկ Բարսեղեան, Անահիտ Սարգսեան եւ այլք: Մրցոյթին «Արմենիա» պարախումբը գրաւած է առաջին պատուաւոր հորիզոնականը, արժանացած «Հանդիսատեսի համակրանք» մրցանակին, ինչպէս նաեւ Ռուսաստանի հայերու միութեան կողմէ պարգեւատրուած Ոսկէ շքանշանով:

Խումբը կը շարունակէ իր աշխոյժ գործունէութիւնը եւ մտադիր է ամէն տարի իր մասնակցութիւնն ունենալ Հայաստանի մէջ կազմակերպուելիք մշակութային ձեռնարկներուն:

 

Scroll Up