Մովսէս Արիստակէսեանն Իր Տան Մէջ Կը Հիւրընկալէ «Քայլ Դէպի Տուն» Ծրագիրի 3 Մասնակից

ՀՀ սփիւռքի նախարարութեան «Քայլ դէպի տուն» ծրագիրին համար առանցքային դերակատարութիւն ունին հիւրընկալ ընտանիքները: Վերջիններուս օգնութեամբ սփիւռքահայ երիտասարդները կը ճանչնան Հայաստանը` ներսէն: Կը ծանօթանան հայկական աւանդական ընտանիքի նիստ ու կացին, սովորոյթներուն` ապրելով ու ընտանիքի անդամներուն հետ իրենց ամէնօրեայ հացը կիսելով:

Երեւան քաղաքի Հարաւ-արեւմտեան Բ2 թաղամասի բնակիչ Մովսէս Արիստակէսեան իր տան մէջ  պիտի հիւրընկալէ «Քայլ դէպի տուն» ծրագիրի միանգամէն երեք մասնակիցի: Ֆրանսա բնակող 17-ամեայ Անժէլօ Բալեանը, 15-ամեայ Թենկիզ Տարտարաշուիլին (Սեւեան) եւ ՌԴ Գրասնոտարի երկրամասին մէջ ապրող 17-ամեայ Ռոբերտ Եազեանը մօտ երկու շաբաթ Մովսէս Արիստակէսեանի հիւրերը պիտի ըլլան:

Երիտասարդներէն մէկը` Թենկիզ Տարտարաշուիլին (Սեւեան) Հայաստան  ժամանած է երէկ` օգոստոս 7-ին: Անոր օդակայանին մէջ դիմաւորած են Մովսէս Արիստակէսեանն ու կինը` Անահիտ Սիմոնեանը, եւ միանգամէն իրենց տուն տարած: Ընդամէնը  քանի մը ժամ հանգստանալէ յետոյ անոնք Թենկիզի հետ այցելած են Ամբերդ, Բիւրական:

«Տեղեկանալով ծրագիրին մասին` մենք ալ որոշեցինք մեր քայլն ընել ու մեր տան մէջ հիւրընկալել ծրագիրի մասնակիցներ: Այս կերպ մեր կարելիութիւններու սահմանին մէջ կը փորձենք աջակցիլ մեր պետութեան, յեղափոխութեան: Միաժամանակ այն լաւ հնարաւորութիւն է, որպէսզի դուրսը բնակող մեր երեխաները ծանօթանան ոչ միայն իրենց հայրենիքին, այլեւ հայկական ընտանիքներուն: Նախապէս ծանօթանալով «Քայլ դէպի տուն» ծրագիրի օրակարգին` ես ալ ինծի համար  իւրատեսակ ծրագիր մը կազմած եմ: Որոշած եմ մեր տան մէջ հիւրընկալուող երիտասարդներուն տանիլ այն վայրերը, որոնք ներառուած չեն ծրագիրին մէջ: Կը ցանկամ, որ այս օրերուն ընթացքին անոնք աւելի շատ տեսարժան վայրեր այցելեն ու հնարաւորինս շատ բան կարենան տեսնել»,- «Հայերն այսօր»-ի հետ զրոյցին ըսաւ  Մովսէս Արիստակէսեան:

Թենկիզն առաջին անգամ կու գայ Հայաստան, թէեւ հազիւ մէկ օր  անցած է, բայց շատ  տպաւորուած է երկրի գեղեցկութեամբ: Ան սիրած է Հայաստանի լեռները, բնութիւնը, զարմացած է այն ամէնով, ինչ կը տեսնէ: «Օրուան ընթացքին արդէն  քանի մը անգամ ըսած է, որ Հայաստանն իր հայրենիքն է, որ թէեւ այցելած է աշխարհի 24 երկիր, բայց Հայաստանն իրեն տպաւորած է ամէնէն շատ: Միշտ կապի մէջ ենք Թենկիզի մօր հետ: Ան քիչ մը անհանգիստ է, քանի որ առաջին անգամ  իր որդին միայնակ կը բնակի: Բայց մենք ամէն ինչ  կ՛ընենք, որ Թենկիզն  երբեք մինակ չզգայ»,- ըսաւ Մովսէս Արիստակէսեան:

Ամբերդի մէջ շրջելէ յետոյ` որոշած են ճաշել «Նոր Ամբերդ» ճաշարանին մէջ: «Երբ այնտեղ իմացան, որ Թենկիզը Հայաստան  ժամանած է մասնակցելու «Քայլ դէպի տուն» ծրագիրին, որ այդ օրերուն ընթացքին մեր տան մէջ պիտի բնակի, ճաշարանի աշխատակիցներն ալ որոշեցին իրենց փոքրիկ լուման ունենալ ծրագիրին մէջ եւ մեզ հիւրասիրեցին իրենց ֆիրմային «Նոր Ամբերդ» ուտեստով»,-պատմեց Մովսէս Արիստակէսեան:

Բիւրականի մէջ արդէն աստղադիտարանի աշխատակից Անահիտի եւ զբօսավար Նարէի օգնութեամբ Թենկիզը ծանօթացած է աստղադիտարանին:

Պարոն Արիստակէսեան պատմեց, որ այսօր երեկոյեան Թենկիզին հետաքրքիր անակնկալ կը սպասուի. «Կինս` Անահիտ Սիմոնեանը, Երեւանի Եղիշէ Չարենցի անուան թիւ 67 հիմնական դպրոցի ուսուցչուհի է: Անոր նախկին աշակերտները դպրոցն աւարտելու 25-ամեակին առիթով հաւաքոյթ  կազմակերպած են եւ կնոջս հրաւիրած: Սակայն ան մերժած էր` ըսելով, որ իր տան մէջ հիւր ունի եւ չի կրնար  անոր մինակ ձգել: Երբ իր նախկին աշակերտներն իմացած են այդ մասին, հրաւիրած են Թենկիզին ու ինծի : Այսօր երեկոյեան Թենկիզը կը տեսնէ, թէ նախկին դասընկերները տարիներ անց ինչպէս  պահպանած են իրենց ընկերութիւնն ու այսօր միասին ոչ միայն կը հաւաքուին, այլեւ կ՛ուրախանան»:

Ընտանիքը վաղը կը ծրագրէ Սեւանայ լիճ այցելել: Մովսէս Արիստակէսեան կը ցանկայ, որպէսզի Թենկիզը Սեւանի մէջ լողայ: Իսկ երեկոյեան անոնց կը միանան Անժէլոն եւ Ռոբերտը, ու արդէն միասին կը փորձեն հետաքրքիր ու յագեցած ժամանակ անցնել: «Մեր նպատակն է, որ երիտասարդները տպաւորուած վերադառնան, որ մէկ օր քայլ ընեն դէպի տուն` արդէն վերջնականապէս: Ճիշդ է, անոնք դեռ երիտասարդ են, շատ նպատակներ ու ծրագիրներ ունին, բայց այս այցելութեան շնորհիւ անոնք կը կապուին հայրենիքին»,- ըսաւ Մովսէս Արիստակէսեան, իսկ տիկին Անահիտը աւելցուց. «Եթէ անգամ  օր մը չվերադառնան Հայաստան, ապա իրենց հայրենիքին, արմատներուն ծանօթանալը անոնց կ’օգնէ հայու անունը բարձր պահել այն երկիրներուն մէջ, ուր կը բնակին»:

 

 

 

 

 

 

 

Scroll Up