Շուէտի ՄԷջ ՀՀ Դեսպանը Կարեւոր Կը Նկատէ Երիտասարդ Շուէտահայերու Ներգրաւումը Սփիւռքի Նախարարութեան Ծրագիրներուն

Հայաստանի մէջ տեղի ունեցած ներքաղաքական փոփոխութիւններն անդրադարձած են նաեւ  երկրի արտաքին քաղաքականութեան շեշտադրումներուն վրայ: Կը նախատեսուին առաւել աշխոյժ գործընթացներ ժողովրդավարութեան հաստատման, մարդու իրաւունքներու  պաշտպանութեան ոլորտներուն մէջ: Ռատիոլուրի հետ զրոյցին նման տեսակէտ  յայտնած է Շուէտի մէջ ՀՀ արտակարգ եւ լիազօր դեսպան  Արտակ Ապիտոնեան: Դեսպանն անդրադարձած է նաեւ Շուէտի հայ համայնքի առանձնայատկութիւններուն ու  շարք մը այլ հարցերու:

Հայաստանի մէջ տեղի ունեցած ներքաղաքական գործընթացները փոփոխութիւններ  բերած են նաեւ արտաքին քաղաքական շեշտադրումներուն մէջ: Շուէտի մէջ Հայաստանի Հանրապետութեան արտակարգ եւ լիազօր դեսպան Արտակ Ապիտոնեանի խօսքով,  աճած է յատկապէս Հայաստանի մէջ իրականացուելիք բարեփոխումներու ծաւալը, ժողովրդավարութեան, մարդու իրաւունքներու պաշտպանութեան խնդիրը կը դառնայ Հայաստանի արտաքին քաղաքականութեան առանցքային ուղղութիւններէն մէկը: Դեսպանն այս ոլորտներուն մէջ աշխոյժ համագործակցութիւն կը կանխատեսէ ինչպէս Շուէտի, այնպէս ալ եւրոպական այլ երկիրներու հետ: Անդրադառնալով Շուէտի շուրջ 13 հազարանոց հայկական համայնքի առանձնայատկութիւններուն, Ապիտոնեան կ՛ընդգծէ` ցրուածութիւնն ամբողջ երկրով մէկ: Հայ  համայնքի անդամները կը փորձեն համախմբել եկեղեցւոյ, մշակութային ամենատարբեր ծրագիրներու շուրջ: Հայաստանեան նոր իրողութիւններու պայմաններուն դեսպանը կարեւոր կը նկատէ յատկապէս երիտասարդ շուէտահայերու ներգրաւումը  սփիւռքի նախարարութեան կողմէ իրականացուող տարբեր ծրագիրներու մէջ:

Հե՞շտ է արդեօք Շուէտի մէջ հայ մնալը. ի պատասխան հարցիս դեսպան Ապիտոնեան կ՛արձագանքէ. «Համայնքէն ներս գործող աւանդական կառոյցներն այդ ուղղութեամբ լուրջ աշխատանք կը տանին, կը գործեն կիրակնօրեայ դպրոցներ, եկեղեցին, ինչպէս արդէն նշուեցաւ, կը կազմակերպուին մշակութային տարաբնոյթ ձեռնարկներ: Կը փորձեն խրախուսել նաեւ համայնքային զբօսաշրջութեան զարգացումը:

Արտակ Ապիտոնեանի վստահեցմամբ, հայ գրականութեան շուէտերէն ներկայացումը  եղած է ու կայ դեսպանատան մշակութային գործունէութեան առանցքային ուղղութիւններէն մէկը

Կը քննարկուին Րաֆֆիի, Բակունցի ստեղծագործութիւններու թարգմանութեան հնարաւորութիւնները: Նարեկացի թարգմանելու ցանկութիւնը մեծ է, բայց շուէտերէն լեզուով որակեալ թարգմանութեան խնդիր կայ:

Արցախեան հիմնահարց, մարդու իրաւունքի ոտնահարման խնդիրը մասնաւորապէս ապրիլեան պատերազմէն ետք. արդեօք Շուէտի հայկական դեսպանատան աշխատանքային գործունէութեան օրակարգին մէջ են, ի՞նչ կ՛ընէ դեսպանատունն այս հարցերը Շուէտի մէջ ներկայացնելու ուղղութեամբ: Ի վերջոյ, որքանո՞վ  հիմնաւորուած տպաւորութիւն է, որ այս հարցերուն  օտարերկրեայ պետութիւններու մէջ գործող հայկական դեսպանատուներն աշխուժութեամբ առանձնապէս չեն առձագանգեր, հարցին Շուէտի մէջ Հայաստանի դեսպանը կը հակադարձէ.

«Ինչպէս Հայաստանի արտաքին գործոց նախարարութեան, այնպէս ալ փաստաբաններու անձնակազմը լրջօրէն կը հետեւին ապրիլեան պատերազմի վայրագութիւններուն վերաբերեալ Եւրոդատարանին ներկայացուած հայկական կողմի հայցադիմումներուն առնչուող իրաւական գործընթացներուն»:

 

Scroll Up