«Արարատ» Եւ «Արեւիկ» Խմբակները Ռոստովահայ Երեխաներու Սիրելի Վայրերն Են

Սփիւռքի մէջ հայ ինքնութեան պահպանման կարեւոր նախապայմաններէն է հայկական կրթօճախներու առկայութիւնը, որոնք իրենց գործունէութեամբ մատաղ սերունդին զերծ կը պահեն ուծացման վտանգէն եւ  կը նպաստեն ազգային ինքնագիտակցութեան զարգացման:

Այդպիսի կեդրոններէն է ՌԴ Տոնի Ռոստովի մարզի Ակսա քաղաքի երիտասարդներու եւ երեխաներու ստեղծագործական լրացուցիչ դաստիարակութեան «Արարատ» եւ Տոնի Ռոստովի «Արեւիկ» խմբակները, որոնց գեղարուեստական ղեկավար Լուսինէ Պետանեան «Հայերն այսօր»-ի հետ զրոյցի ընթացքին կը ներկայացնէ խմբակի ստեղծման պատմութեան եւ ազգապահպանութեան գործի կազմակերպման մանրամասնութիւնները:

Մտահոգ էի նաեւ երեխաներուս ապագայով…

-Այս խմբակները ստեղծուած են տաս տարի առաջ: Երբ կը տեսնէի, որ ռոստովահայ երեխաները հայերէն լաւ չէին կրնար խօսիլ, մեծ ցաւ  կ՛ապրէի: Որոշեցի անոնց հայեցի կրթութիւն, դաստիարակութիւն տալու եւ Հայաստանի շուրջ համախմբելու նպատակով այս խմբակները բանալ: Մտահոգ էի նաեւ երեխաներուս ապագայով: Դիմելով քաղաքային իշխանութիւններուն` խնդրանքս անպատասխան չմնաց: Մենք առաջին ենք Տոնի Ռոստովի ազգային փոքրամասնութիւններու մէջ, որ Ակսայի մէջ երեխաներու լրացուցիչ կրթութեան կեդրոնին մէջ ունինք մեր ազգային խմբակը:

Ճիշդ է, որոշ ժամանակ առաջ խմբակը փակուելու լուրջ խնդիրի առջեւ  կանգնած էր, սակայն չվհատեցանք, միախմբուած յաղթահարեցինք մեր առջեւ ծառացած խնդիրները եւ շարունակեցինք բնականոն աշխատանքը: «Արեւիկ» խմբակը Տոնի Ռոստովի մէջ կը գործէ:

Չնայած մեր հայ ուսուցիչներու աշխատավարձը ցած է, սակայն անոնք անձնուիրաբար կ՛աշխատին` գիտակցելով իրենց գործի կարեւորութիւնը:

Խմբակներուն մէջ կը դասաւանդուին հայոց լեզու, հայ գրականութիւն, հայոց պատմութիւն: Այս պահուն Տոնի Ռոստովի «Արեւիկ» խմբակին մէջ քառասունհինգ աշակերտ ունինք, յոյսով ենք` նոր ուսումնական տարուան մէջ աշակերտներու թիւը կ’աւելնայ: Ի դէպ, 2017-2018 թթ. ուստարուան համար առաջին անգամ չորս տարեկան երեխաներու  խումբ  ձեւաւորած եմ: Առհասարակ, բոլոր հնարաւոր միջոցները կ՛օգտագենք` աշակերտներ  հաւաքագրելու համար:

Ռուսերու համար հայերէնը հաճելի լեզու է…

– Ցաւօք, Տոնի Ռոստով ծնած հայերն աչքի չեն իյնար հայերէնի լաւ իմացութեամբ: Այս տարի ՀՀ կրթութեան եւ գիտութեան նախարարութեան կողմէ իրականացուող ուսուցիչներու վերապատրաստման դասընթացներու ժամանակ սորված նոր ուսուցման մեթոտներն անպայման պիտի կիրառեմ` անոնց հայերէն սորվեցնելու համար:

Մեր մօտ նաեւ ռուսերը հայերէն կը սորվին: Անոնք հաճոյքով կու գան դասերուն, նոյնիսկ կ՛ըսեն` հայերէնն իրենց համար դիւրընկալելի եւ հաճելի լեզու է: Հասած ենք այն արդիւնքին, որ մէկ ռուս աշակերտ, մասնակցելով շարադրութիւններու մրցոյթին, յաղթող ճանչցուած է:

Մեծ շուքով կը նշենք ազգային, եկեղեցական, պետական տօները…

-Կը կարծեմ` ծնողները պէտք է նպաստեն, որ երեխաները հայերէն սորվին, խմբակ սիրով գան եւ օտարութեան մէջ պահպանեն ինքնութիւնը: Մենք նոյնպէս ազգային ոգին բարձր պահելու համար անոնց հետ յաճախակի բարոյախրատական զրոյցներ կ՛ունենանք :

Մեծ շուքով կը նշենք ազգային, եկեղեցական, պետական տօները, որոնց աշակերտները մեծ խանդավառութեամբ կը պատրաստուին:

Ռուսական համայնքին հետ ազգամիջեան բարեկամական յարաբերութիւններ ունինք. գրեթէ ոչ մէկ ձեռնարկ առանց անոնց ներկայութեան չանցնիր: Երկկողմ հրաւէրները պարտադիր բնոյթ կը կրեն:

Համայնքէն ներս հիւրընկալեցինք Ապրիլեան քառօրեայ պատերազմի հերոսներուն…

– Սոյն թուականի յունիս 3-ին Տոնի Ռոստով քաղաքի հայութիւնն այս ալ երրորդ տարին` կը համախմբուի մէկ գաղափարի շուրջ: Այն է` «Արցախը ես եմ» բարեգործական համերգի ծիրէն ներս ըլլալ հայ զինուորի կողքին, ինչ-որ չափով սատար կանգնիլ անոր հոգերուն: Առաջին անգամ օգնութիւնը հասաւ Վարդենիսի շրջանի Զոլաքար գիւղ` զոհուած ազատամարտիկներ Գառնիկ Մելքոնեանի եւ Դաւիթ Յովսէփեանի ընտանիքներուն: Երկրորդ անգամ կապ հաստատեցինք «Աջակցութիւն վիրաւոր զինուորներուն» հասարակական կազմակերպութեան ղեկավար Հայկուհի Մինասեանի հետ, որուն բարեխիղճ օգնութեամբ եւ անմիջական մասնակցութեամբ կրցանք  քանի մը զինուորներու խնդիրներ եւ հոգեր եւս թեթեւցնել: Այս տարի արժանանալով տեղի հայ համայնքի, պաշտօնեայ այրերու եւ գործարարներու բարձր վստահութեան` հայկական համայնքի ղեկավարութեան բարձր աջակցութեան ներքոյ որոշեցինք դուրս գալ համացանցային շփումներէն եւ այստեղ հրաւիրել զինուորներուն, որպէսզի արտերկրի մէջ եւս տեսնեն եւ ճանչնան անոնց իրական, այլ ոչ թէ առցանց:

Համայնքէն ներս հիւրընկալուած էին Քառօրեայ պատերազմի ժամանակ վիրաւորուած Հայկ Սեխլիյեանը, Հայկ Թորոսեանը, Դանիէլ Դաւթեանը: Անոնց օգնելու նպատակով խումբին  միացեած էին «Դիրքապահ քառօրեայ պատերազմի մասնակիցներու միաւորում» հասարակական կազմակերպութեան նախագահ Մանուէլ Մանուկեան եւ Սամուէլ Մանուկեան: Հպարտութեամբ պէտք է նշել, որ կազմակերպուած համերգին մասնակցելու մեր առաջարկին միանգամէն սիրով արձագանքեց նաեւ սիրուած ժողովրդական երգիչ Արսէն Գրիգորեան (Մրոն): Կէս ժամ շարունակ սիրուած երգիչը հանդիսատեսին ոգեւորեց իր հայրենասիրական երգերով եւ հայաշունչ ոգով: Համերգի ընթացքին կատարուած հանգանակութիւններու եւ տոմսերու վաճառքէն գոյացած 181 000 ռուբլին ծախսուած է բազմաթիւ կազմակերպչական հարցեր լուծելու համար: Բացի այս ամէնէն տղաները մէկ շաբաթ գտնուեցան «Նադեժդա» առողջարանին մէջ, անոնց համար կազմակերպուեցան տարբեր բնոյթի շրջագայութիւններ դէպի թանգարաններ, հայկական գիւղեր, տեսարժան վայրեր: Տղաները վայելեցին նաեւ Տոն գետի գեղեցկութիւնը` կատարելով կէսօրեայ նաւարկութիւն: Երեկոները յագեցած էին բազմաբնոյթ հանդիպումներով` երիտասարդներու, տեղի պատկան այրերու հետ: Տէ, ի հարկէ, օրը կը լրացնէին տեղի գործարարները` կազմակերպելով տղաներու ընթրիքը:

Շնորհակալութիւն կը յայտնենք բոլոր այս կառոյցներուն, որոնք գտնուեցան մեր կողքին. տոմսերու ամրագրման ծառայութիւն «Լայներ», «Ջաւախք», «Մոցարտ», «Տոն շաշլիկա», «Քեապապ-կրիլ հաուզ», «Լաւաշ հաուզ» ընկերութիւններ: Կան նաեւ անհատ բարերարներ, որոնք չցանկացան, որ անուններ հրապարակենք: Իրապէս, եթէ չըլլար այս բոլոր բարերարութիւնները, ապա այն գումարը, որ հաւաքուեցաւ համերգի ծիրէն ներս, չէր բաւականացներ այս հսկայածաւալ ծրագիրն իրականացնելու համար:

Մայիս 29-էն մինչեւ յունիս 5 տղաները Տոնի Ռոստովի մէջ արժանացան բարձր հիւրընկալութեան, վայելեցին տեղի հայութեան սէրն ու յարգանքը: Տղաները վերադարձան հայրենիք` բարձր տրամադրութեամբ, յագեցած բազում անմոռանալի տպաւորութիւններով, ինչպէս նաեւ դրամական պարգեւներով:

Հպարտօրէն պէտք է նշեմ, որ այս ծրագիրին իրենց բարձր աջակցութեամբ միացան նաեւ Տոնի Ռոստովի հայկական համայնքի ղեկավար Յարութիւն Արմենակի Սուրմալեան եւ գլխաւոր հիւպատոս Վարդան Ասոյեան:

Գէորգ  Չիչեան

Scroll Up