Հաղարծինի Մէջ Սկիզբ Առած է Աւանդական Դարձած Փառատօնը

«Հայաստանը հրաշալի է, Տաւուշը՝ բացառիկ, ով որ Տաւուշը չէ տեսած, Հայաստանը չէ տեսած»: «Հաղարծինի շաբաթ» փառատօնին բացման ընթացքին այսպէս ըսած են երիտասարդ կամաւորները, որոնք եօթը օր շարունակ՝ ժպիտով ու բարեհամբոյր վերաբերմունքով՝ պիտի «ստիպեն» կրկին ու կրկին վերադառնալու Տաւուշ: Օգոստոս 6-ին, Հաղարծին վանական համալիրի տարածքին, աղօթքով մեկնարկած է արդէն աւանդական դարձած փառատօնը: Բացման ելոյթներէն ետք՝ «Գեղարդ» երգեցիկ խումբը (գեղարուեստական ղեկավար՝ Մհեր Նաւոյեան, խմբավար՝ Անահիտ Պապայեան) հոգեւոր երգերու իր կատարումներով թեթեւութիւն ու մաքրութիւն սփռած է շուրջբոլորը: Այս մասին կը հաղորդէ Armenpress.am-ը։

Տաւուշի թեմի առաջնորդ Տէր Բագրատ եպիսկոպոս Գալստանեան, անուն առ անուն ողջունելով բոլոր ներկաները, նկատած է, որ երիտասարդ կամաւորներն ու ճեմարանականները մէկ շաբաթ շարունակ՝ արդէն երրորդ տարին՝ Հաղարծինի վանքը կը վերածեն հոգեւոր ջրտուքի, այնպիսի միջավայրի մը, ուր իրենք կրկին ու կրկին կը ծնին։

«Գիտեմ, թէ դուք որքան ջերմութեամբ կը սպասէք այս փառատօնին, որքան անհամբերութեամբ կը սպասէք այդ նոր շրջանին: Ես չափազանց հպարտ եւ ուրախ եմ ձեզմով, որ այսքան յամառութիւն, կամք ու սէր ունիք ու այսքան մեծ յանձնառութեամբ կ՝ուզէք տէր կանգնիլ մեր ժառանգութեան ու ներկայացնել բոլոր անոնց, որոնք կ’այցելեն Հաղարծինի չքնաղ վանական համալիր»,- ըսած է Բագրատ Սրբազանը, որ բազմիցս նշած է՝ նախաձեռնութիւնը Տաւուշի թեմի երիտասարդներունն է:

Սրբազանի խօսքով՝ «Հաղարծինի շաբաթ»-ը կարելի է դիտարկել ե՛ւ զբօսաշրջութեան զարգացման, ե՛ւ Տաւուշի հանրահռչակման տեսանկիւնէն, բայց իրեն համար ամենակարեւորը երիտասարդներուն միասնութիւնն ու անցած ճանապարհն է: «Տարբեր ձեւերով ու տեսանկիւններէն կը գնահատեն այս փառատօնը, ես ըսած եմ, որ ատիկա շատ ճիշդ ու լաւ է, բայց ինծի համար ամենակարեւորը դուք էք: Իմ մաղթանքը այն է, որ ամէն անգամ այս շաբաթը անցնելէ ետք ա՛լ աւելի սերտանաք, ա՛լ աւելի սիրոյ մէջ ըլլաք, ա՛լ աւելի իրարու գգուէք ու վեր պահէք մեր Տաւուշ աշխարհը, որուն միջոցով՝ նաեւ Հայաստանը: Դառնաք յոյս տուողներ, յոյս կրողներ, սէր տուողներ, սէր կրողներ»,- ըսած է Տաւուշի թեմի առաջնորդը։

Scroll Up