Նոր Զելանտայի Խորհրդարանը Հնարաւոր Է Ճանչնայ Հայոց Ցեղասպանութիւնը

Նոր Զելանտայի Կանաչներու կուսակցութիւնը դիմած է երկրի խորհրդարանին` ճանչնալու 1915 թուականին իրականացուած Հայոց ցեղասպանութիւնը:

20-րդ դարու առաջին ցեղասպանութիւնը ճանչնալու նախաձեռնութեամբ հանդէս եկած է խորհրդարանի պատգամաւոր, Կանաչներու կուսակցութեան անդամ Կարետ Հիւգսը:

«Մենք կը պատրաստուինք հարցը մտցնել խորհրդարանի օրակարգ եւ կը խնդրենք բոլոր պատգամաւորներուն միանալ մեզ: Հայերուն հանդէպ  կատարուածը կը վերաբերի ամբողջ մարդկութեան»,- մէջբերելով պատգամաւորին խօսքերը`  կը յայտնէ tvnz.co.nz  Նորզելանտական կայք-էջը:

Կարետ Հիւգսը յայտարարած է նաեւ, որ Նոր Զելնատան պէտք է հետեւի Գերմանիոյ, Հոլանտայի, Ֆրանսայի եւ այլ երկիրներու օրինակին, որոնք ճանչցած են Հայոց ցեղասպանութիւնը:

«Մենք բազմիցս տեսած ենք, թէ ինչպէս պատմութիւնը կը կրկնուի: Ցեղասպանութիւնը կրնայ   անգամ մը եւս տեղի ունենալ, եթէ մենք չճաչնանք մեր անցեալը»,- ըսած է Նոր Զելանտայի Հայ դատի յանձնախումբի նախագահ Հուրի Ելտըզեան:

Նոր Զելնատայի Հայ դատի յանձնախումը կը նախատեսէ նաեւ խորհրդարանին մէջ ցուցադրել «Կործանելու մտադրութիւնը»  («Intent to Destroy») վաւերագրական ֆիլմը, որուն ցուցադրութեան հրաւիրուած են նաեւ փորձագէտներ եւ հայ համայնքի ներկայացուցիչներ:

Scroll Up