Արցախի Համալսարանի Արեւմտահայերէնի, Հայագիտութեան Կեդրոնի Բարերարները Հանդիպած Են Համալսարանի Անձնակազմին Հետ

Ստեփանակերտի Գրիգոր Նարեկացի համալսարանին մէջ տեղի  ունեցած է հանդիպում համալսարանի արեւմտահայերէնի, հայագիտութեան, գիտահետազօտական կեդրոնի բարերարներ Լուտովիկա եւ Յակոբ Այնթապլեաններու հետ:

«Արցախփրես»-ի թղթակիցի հաղորդմամբ` համալսարանի տնօրէն Վարդան Յակոբեանի գլխաւորութեամբ հանդիպման  մասնակիցները ծաղիկներ     խոնարհած են   Գրիգոր  Նարեկացիի պատուանդանին:

Բացման խօսքով ձեռնարկին հանդէս եկած է Վ. Յակոբեան: Ան շնորհակալութիւն    յայտնած է   Լուտովիկա եւ Յակոբ Այնթապլեաններուն`  նշելով, որ անոնց շնորհիւ  Արցախի մէջ  բացուած է արեւմտահայերէնի, հայագիտութեան, գիտահետազօտական  առաջին կեդրոնը: Վ. Յակոբեան  նշած  է, որ    կեդրոնի  արդիւնքներն  արդէն  տեսանելի  են: «Ներկայիս կեդրոն  կը յաճախէ 30  ուսանող. անոնք  կը մասնակցին անվճար  տարբեր դասընթացներու: Կեդրոնին մէջ դասախօսութիւններով  հանդէս կու գան Արցախի, Հայաստանի  եւ  արտերկրի    նշանաւոր  մասնագէտներ: Կառոյցը կը ծառայէ նաեւ որպէս հայագիտութեան կեդրոն եւ այստեղ  ուսումնասիրութիւններ կը   կատարուին ուսանողներու եւ  դասախօսներու   կողմէ»,-մասնաւորապէս ըսած է Վ. Յակոբեան եւ  աւելցուցած, որ   իրենք    հպարտ  են, որ  օրէ օր  Արցախի մէջ   աւելի  մեծ  ուշադրութիւն  կը   դարձուի  արեւմտահայերէնի  ուսուցման:

ԱՀ  կրթութեան, գիտութեան  եւ  մարմնակրթութեան  փոխնախարար   Արմէն   Սարգսեան   խօսելով  Արցախի մէջ  արեւմտահայերէնի  ուսուցման   մասին`  նշած  է, որ  տասնամեակներ շարունակ  արցախցիներուն  մօտ  կարօտ   կար   դէպի   արեւմտահայերէնը: Կեդրոնի  առաքելութիւնն   է` ուժեղացնել  արեւմտահայերէնի ուսուցումը:

Բանաստեղծ, սրտաբան, բառարանագիր, ԱՄՆ-էն ժամանած բարերար  Յակոբ Այնթապլեան  ըսած  է, որ, բանալով    կեդրոնը,  իրենք նպատակ    ունեցած են  մեծ  ուշադրութիւն դարձնել հայերէնի դասական ուղղագրութեան, քանի  որ  այդ  խնդիրն առկայ է եւ այն  առաջնահերթ լուծում  կը  պահանջէ:

«Հայաստանի մէջ պիտի գործէ դասական ուղղագրութիւնը: Ներկայիս  հայոց լեզուն անտանելի վիճակի մէջ է. գրութեան մեծ  մասը կ՛օգտագործուի   լատինատառ: Պէտք  է մեսրոպեան այբուբենով   գրենք: Մեր  ամէնօրեայ բառապաշարը  պէտք  է ըլլայ  մաքուր  հայերէնով: Հայաստանն ու  Արցախը զօրանան  պիտի  ոչ միայն  տնտեսապէս, այլ մաքուր հայերէնով: Ես  հրատարակած եմ  բառարան, ուր  ներառուած  են  միմիայն մաքուր   հայերէն  բառեր»,-մասնաւորապէս  ըսած  է  բարերարը:

Արեւմտահայերէնի, հայագիտութեան, գիտահետազօտական Լուտովիկա եւ Յակոբ Այնթապլեան կեդրոնի տնօրէն, Գրիգոր Նարեկացի համալսարանի դասախօս  Ամալիա  Գրիգորեան      իր   ելոյթին մէջ անդրադարձած  է  կառոյցին կողմէ  տարուող   աշխատանքներուն  եւ   ընելիքներին: Ան նշած   է, որ  Յ. Այնթապլեան այն եզակի նուիրեալ հայորդիներէն է, որ խորապէս մտահոգուած է հայրենիքի, ազգի   եւ  հայոց լեզուի ճակատագրով: Ան հայերէնապահ  մեծ առաքելութիւն  ստանձնած է ոչ միայն Սփիւռքի, մայր Հայաստանի, այլեւ Արցախի մէջ: Այս կեդրոնն  ալ հէնց ատոր վառ վկայութիւնն է:

Ա.  Գրիգորեան  տեղեկացուցած է նաեւ, որ  ընթացիկ  տարուան  մարտ 5-էն կեդրոնը սկսած է իր գործունէութիւնը: Մեկնարկած են եռամսեայ անվճար դասընթացներ: Դասընթացները կը կատարուին  հինգ առարկաններու` գրաբար, արեւմտահայերէն, արեւմտահայ գրականութիւն, հայկական հարցի պատմութիւն, սփիւռքահայ գրականութիւն: Կեդրոնին մէջ պարբերաբար կը կազմակերպուին տարբեր ձեւաչափերու ձեռնարկներ, քննարկումներ, գիտութեան, արուեստի, մշակոյթի երեւելի ներկայացուցիչներու հետ հանդիպումներ: Ի դէպ, կեդրոնին մէջ կը գործէ նաեւ ասմունքի խմբակ, որուն աշխուժօրէն կը մասնակցին մեր  ուսանողները:

Ձեռնարկին  ներկայ  էին  ԱՄՆ-էն ժամանած  Մեսրոպ Մաշտոց համալսարանի տնօրէն Կարպիս Եղիյեան, համալսարանի  դասախօսներ,  ուսանողներ  եւ  այլք:

 

Scroll Up