Հայաստանի ՄԷջ Կը Սպասուի «Աստղային Անձրեւ»

Օգոստոս  12-13-ի գիշերը տեղի կ’ունենայ Պերսէիդների ասուպային հոսք:

Ինչպէս «Հայերն այսօր»-ին կը տեղեկացնեն Վիկտոր Համբարձումեանի անուան Բիւրականի աստղադիտարանէն, երկիրը` Արեգակի շուրջն իր տարեկան պտոյտի ժամանակ, կ՛անցնի  շարք մը երկնաքարերու կոյտերու միջով` յառաջացնելով ասուպային հոսքեր, որոնք կ՛անուանուին «Աստղաթափ» կամ «Աստղային անձրեւ»:

«Սուիֆտի-տուտլի գիսաւորի ձգած փոշիի եւ սառէ հատիկներու օղակին միջէն անցնելուն կ՛առաջանայ Պերսէիդներու հոսքը: Մթնոլորտին հետ շփումէն ատոնք կը սկսին այրիլ` առաջացնելով գեղեցիկ տեսարան` կը թուի, թէ աստղեր կ՛իյնան: Երկրէն կը թուի, թէ այդ պայծառ շիթերը կը թափին Պերսեւս (կամ Պերսեոս) համաստեղութենէն: Այստեղէն ալ անուանումը` Պերսէիդներ: Պերսէիդներու հետ միաժամանակ երկինքէն  կը թափին Աքվարիդներ եւ Կապրիկորնիդներ ասուպները: Սակայն անոնց հեշտութեամբ կարելի է տարբերել: Պերսէիդները, որպէս կանոն, սպիտակ են, Ակվարիդները` կապոյտ, Կապրիկորնիդները` դեղին կամ նարնջագոյն: Այդ գիշերը մէկ ժամուան մէջ կարելի է դիտել 60-70 ասուպ: Առատ են նաեւ ատոր նախորդող եւ յաջորդող գիշերները»,- ըսուած է Բիւրականի աստղադիտարանի տարածած հաղորդագրութեան մէջ:

Կը նշուի, որ սովորաբար ասուպային հոսքերը կը տեւեն մէկ շաբաթ կամ նոյնիսկ աւելի երկար: Օգոստոս 12/13-ի գիշերն այդ ասուպային հոսքի առաւելագոյն փուլն է: Ասուպային հոսք կարելի է տեսնել օգոստոսի հետեւեալ օրերուն` 11/12, 12/13 եւ 13/14: Պերսէիդներու ասուպային հոսքի յաջորդ այսպիսի աշխուժութիւնը կը կանխատեսուի 2028թ.-ին:

 

 

 

Scroll Up