Լիզպոնի Հինգ Մարտիկներուն Նուիրուած Ֆութպոլի Մրցաշար Նոր Ջուղայի ՄԷջ

Նոր Ջուղայի Հայ մարզամշակութային «Արարատ» միութեան Սկաուտական միաւորի Գերագոյն մարմնի նախաձեռնութեամբ եւ համագործակցութեամբ միաւորի կազմակերպիչ եւ միութեան Ֆութպոլի յանձնախումբերու, յուլիս 27-ին միութեան մարզասրահին մէջ տեղի ունեցաւ ֆութպոլի մրցաշարի հանդիսաւոր բացում` նուիրուած հինգ անձնազոհ մարտիկներ` Սեդրակ Աճեմեանի, Վաչէ Դաղլեանի, Արա Քերջլեանի, Սիմոն Եահընեանի եւ Սարգիս Աբրահամեանի նահատակութեան 35-ամեակին: Երեկոն սկիզբ առաւ դրօշակի արարողութեամբ, որմէ յետոյ ներկաները մէկ վայրկեան լռութեամբ յարգեցին Լիզպոնի հինգ մարտիկներուն յիշատակը:

Ներկաները ողջունեցին եւ բացման խօսքով հանդէս եկան ձեռնարկի հանդիսավարներ Տաթեւիկ Տէր-Մարտիրոսեան եւ Արթուր Քամարզարեան, ապա ելոյթ ունեցաւ Սկաուտական միաւորի Գերագոյն մարմնի նախագահ Վեհանոյշ Խուդաբախշեան: Գեղարուեստական բաժինին մէջ «Լիզպոնի երգը» ասմունքի համադրութեամբ կատարեցին Արփինէ Մովսիսեան եւ Դուին Յովհաննիսեան: Ընթացքին ասմունքի եւ երգի կատարումներով հերթաբար ելոյթ ունեցան Ստեփանիա Յակոբեան եւ Լուսիա Գալստեան` կատարելով Գէորգ էմինի «Հայրենիք» բանաստեղծութիւնը եւ «Տեսնեմ Անին ու նոր մեռնեմ» երգը, իսկ սկաուտներէն կազմուած երգչախումբը կատարեց «Նժդեհիկներու երդումը» եւ «Ոչ, չեն մեռնում հերոսները» երգերը:

Գեղարուեստական բաժինի աւարտին սկսաւ մրցութային բաժինը, ուր մրցադաշտ իջան «Արարատ» եւ «Արցախ» խումբերը:

Նոր Ջուղայի մէջ  ամէն տարի իրականացուող Լիզպոնի հինգ հերոսներուն նուիրուած հնգօրեայ ֆութպոլի մրցաշարը կը կազմակերպուի հայ համայնքի երիտասարդներէն կազմուած սիրողական խումբերու մասնակցութեամբ: Այս տարուան մրցաշարին մասնակցութիւն բերած էին «Արարատ», «Արցախ», «Բռունցք», «Զեփիւռ», «Նաիրի» եւ «Արքա» խումբերը:

Հնգօրեայ մրցումներու արդիւնքով յուլիս 30-իի մրցեցան եզրափակիչ փուլ անցած «Արարատ» եւ «Արցախ» խումբերը: Խաղն աւարտեցաւ 4-3 հաշուով, յօգուտ` «Արարատ»-ի: Մրցոյթի աւարտին առաջին եւ երկրորդ տեղերը գրաւած խումբերու մարզիկները,  մրցավարները եւ Միութեան Ֆութպոլի յանձնախումբը գնահատուեցան գնահատագիրներով եւ յուշանուէրներով:

Մրցաշարը վարեցին Էդմոնդ Բաղդասարեան, Կարօ Շահբազեան եւ Արթին Մելիքեան:

Խաղերու կազմակերպիչ յանձնախումբը կը ներկայացնէին` Սեպուհ Վարդանեան, Մանիա Բէգիջանեան, Լուսիա Գալստեան, Սասուն Սիմոնեան, Տաթեւիկ Տէր-Մարտիրոսեան, Ռուբէն Խոսրովեան եւ Հարմա Կարապետեան, իսկ յանձնախումբի եւ միաւորի Գերագոյն մարմինը` Նարեգա Սիմոնեան:

Յիշեցման կարգով նշենք, որ 1983 թ. յուլիս 27-ին, Հայ Յեղափոխական Բանակի հինգ տղաները անձնազոհական գործողութամբ զինուած յարձակում կատարեցին Փորթուկալի մայրաքաղաք` Լիզպոնի մէջ տեղակայուած Թուրքիոյ դեսպանատան վրայ եւ 3-ժամեայ գրաւումէն ետք` պայթեցուցին այն ու փլատակներու տակ ողջակիզուելով բարձրաձայնեցին Հայոց Ցեղասպանութեան իրողութիւնն ու Հայ Դատի արդար լուծում գտնելու պահանջատիրութիւնը:

Նոր Ջուղայի «Արարատ» միութեան թղթակից

Երանուշ Թահմազեան

Լուսանկարները` հեղինակին

 

Scroll Up