Երեւանի ՄԷջ Հանդիպած Են Դաշնակցութեան Հայաստանի Եւ Լիբանանի Ուսանողական Միութիւններու Անդամները

Օգոստոս 2-ին Երեւանի մէջ, ՀՅԴ Սիմոն Վրացեան կեդրոնին մէջ հանդիպում  տեղի ունեցած է ՀՅԴ Հայաստանի «Նիկոլ Աղբալեան» եւ Լիբանանի «Սիմոն Զաւարեան» ուսանողական միութիւններու վարչութիւններուն եւ անդամներուն միջեւ:

ՀՅԴ ՆԱՈՒՄ անդամները ողջունած են «Դէպի երկիր» 2018 «Արամի կամքով, արցախեան ոգիով» ծրագիրի ծիրէն ներս Հայրենիքի մէջ գտնուող եւ պատանեկան ճամբարներ կազմակերպող լիբանանահայ երիտասարդ դաշնակցականները: Կարեւոր համարուած է հայրենիք-սփիւռք կապերու անընդհատութեան խորացման ու պատանիներու կրթադաստիարակչական գործի կազմակերպման ուղղուած նմանատիպ ձեռնարկներու շարունակականութեան անհրաժեշտութիւնը:

Քննարկուած են նաեւ Հայաստանի մէջ իշխանութեան խաղաղ անցումէն ետք ձեւաւորուած ներքաղաքական նոր իրողութիւնները, առկայ մարտահրաւէրներն ու հնարաւոր ներքին ու արտաքին զարգացումները, ինչպէս նաեւ ներկուսակցական-միջմիութենական յարաբերութիւններու առաւել սերտացմանը ուղղուած յատուկ ծրագիրները:

Համաձայնութիւն ձեռք բերուած է Հայաստանցի եւ լիբանանահայ ուսանողութեան համար կրթական կարճաժամկէտ եւ միջնաժամկէտ ծրագիրներ իրագործելու շուրջ համատեղ աշխատանքներու մեկնարկին վերաբերեալ:

ՀՅԴ «Նիկոլ Աղբալեան»
ուսանողական միութիւն

 

 

Scroll Up