Աւստրալահայերը Ցանկութիւն Յայտնած Են Թաղամաս Կառուցելու Արցախի Քարվաճառ Քաղաքին ՄԷջ

Աւստրալիոյ մեր հայրենակիցները ցանկութիւն  յայտնած են յիսուն բնակելի տուներով թաղամաս մը կառուցելու Քարվաճառ քաղաքին մէջ:

«Արցախփրէս»-ի թղթակիցի հաղորդմամբ` այս մասին այսօր հրաւիրուած մամլոյ ասուլիսին յայտնած է ԱՀ քաղաքաշինութեան նախարար Կարէն Շահրամանեան:

«Սակայն այս հարցին շուրջ դեռեւս քննարկումներ կ՛ընթանան, քանի որ մեր կողմէ բնակելի տուներու կառուցման նախապատուութիւնը կը տրուի ոչ թէ միայն Քարվաճառ քաղաքին, այլեւ ողջ Շահումեանի շրջանի տարբեր համայնքներու մէջ»,- նշած է Կ. Շահրամանեան:

Նախարարի նման մօտեցումը պայմանաւորուած է Շահումեանի շրջանի  շարք մը համայնքներու դպրոցներուն մէջ անհրաժեշտ մասնագէտներու պակասով, քանի որ ատիկա ալ իր հերթին կապուած է նշուած համայնքներուն մէջ բնակարանային պայմաններու բացակայութեամբ: «Ցանկալի է, որ բնակելի տուները կառուցուին շրջանի տարբեր համայնքներու մէջ, որոնք օգտագործման իրաւունքով կը տրամադրուին այդ համայնքներուն մէջ դասաւանդելու եկած մասնագէտներուն, որպէս պետական սեփականութիւն»,- պարզաբանած  է նախարարը:

Կ. Շահրամանեան ընդգծած է, որ Շահումեանի շրջանի դպրոցներուն մէջ դասաւանդելու համար մասնագէտներուն բնակարանային պայմաններով ապահովելը կը խթանէ մեծ թիւով մասնագէտներու ներգրաւման եւ շրջանին մէջ կրթական կեանքի աշխուժացման:

Scroll Up