Կլենտէլի ՄԷջ Սփիւռքի Նախարար Մխիթար Հայրապետեան Հանդիպած Է Հայ Համայնքի Շուրջ 700 Ներկայացուցիչներու Հետ

Յուլիս 31-ին Սփիւռքի նախարար Մխիթար Հայրապետեան Կլենտէլի Community Town Hall-ին մէջ  հանդիպում   ունեցած է հայ համայնքի շուրջ 700 ներկայացուցիչներու հետ:

Հանդիպումը տեւած է 2 ժամ, որուն ընթացքին նախարարը պատասխանած է նաեւ համայնքի ներկայացուցիչներու հարցերուն:

Մխիթար Հայրապետեան զրոյցին սկիզբը խօսած է Լոս Անճելըսի մէջ ունեցած իր հանդիպումներուն մասին` նշելով, որ ատոնք բաւականին յուսադրող են, ապա անդրադարձած է Սփիւռքի նախարարութեան մէջ սպասուող կառուցուածքային փոփոխութիւններուն:

«Կը պատրաստուինք կառուցուածքային մեծ փոփոխութիւններ ընել, որպէսզի բարձրացնենք մեր գերատեսչութեան արդիւնաւէտութիւնն ու մտարուեստութիւնը: Կան բազմաթիւ ստորաբաժանումներ, որոնց գործառոյթը այդքան ալ պարզ չէ, պէտք է յստակեցնել: Նոր ստորաբաժանումներ պիտի ըլլան, իսկ որոշները պիտի փակուին»:

Համայնքի ներկայացուցիչներուն նաեւ հետաքրքրած է նախարարութեան նոր ու երիտասարդ անձնակազմը:

«Մենք կը փորձենք համադրել երիտասարդական եռանդը, ստեղծարարութիւնն ու այն փորձը, որ արդէն առկայ է նախարարութեան մէջ: Պիտի նշեմ, որ վերջին 10 տարիներուն ընթացքին նախարարութիւնն ըրած է աշխատանք եւ գնահատելու շատ բան կայ, պարզապէս հարկաւոր էր նոր, երիտասարդական շունչ»:

Մխիթար Հայրապետեան չմոռցաւ ընդգծելու, որ նախարարութեան նոր անձնակազմը  անընդհատ կը սորվին, պատրաստ են լսելու եւ ընդունելու խորհուրդներ, ու յորդորեց, որ ներկաներէն իւրաքանչիւրը ներգրաւուի իրենց ունեցած փորձը երիտասարդներուն փոխանցելու կարեւոր գործին մէջ:

Հանդիպման ընթացքին նախարարը ներկայացուց նաեւ նախարարութեան ապագայ ծրագիրները` խօսելով «Քայլ դէպի տուն» եւ «ՆերՈւժ» ծրագիրներուն մասին:

Յիշեցնենք, որ Սփիւռքի նախարար Մխիթար Հայրապետեան աշխատանքային այցով կը գտնուի ԱՄՆ: Նախարարին հանդիպումները կը շարունակուին:

 

Scroll Up