Սփիւռքի Նախարարը Հանդիպում Ունեցաւ Էլիզա Մինասեանի Հետ

Սփիւռքի նախարարը յուլիս 18-ին ընդունեց ԱՄՆ «Ճինիշեան» յիշատակի ծրագիրի (ՋՀԾ) գործադիր տնօրէն Էլիզա Մինասեանը: Նախարարին հետ զրոյցին հիւրը ներկայացուց հիմնադրամի գործունէութեան վերաբերեալ մանրամասնութիւններ, խօսեցաւ այն ծրագիրներուն մասին, որոնք այժմ կ՛իրականացուին:

Հիւրը անդրադարձաւ նաեւ Նիւ-Եորքի մէջ ապրող հայերու ոգեւորուածութեան, որուն պատճառը Հայաստանի մէջ տեղի ունեցած Թաւշեայ յեղափոխութիւնն էր: Էլիզա Մինասեան նաեւ նշեց, որ մեր հայրենակիցներէն շատերը կը ցանկան հայրենադարձուիլ, գալ հայրենիք, ապրիլ Հայաստանի մէջ եւ գործունէութիւն ծաւալել:

Նախարար Մխիթար Հայրապետեան շնորհակալութիւն յայտնեց հիւրին եւ յոյս յայտնեց, որ յետագայ համագործակցութիւնը ԱՄՆ «Ճինիշեան» յիշատակի ծրագիրին հետ շարունակական կ՛ըլլայ:

ԱՄՆ «Ճինիշեան» յիշատակի ծրագիրը ծաւալուն եւ կենսական կարեւորութեան ծառայութիւններ  մատուցած է աշխարհի տարբեր ծայրերու մէջ ապրող հարիւր հազարաւոր հայերու, որոնք ապրելով հակամարտութեան, աղքատութեան եւ անկայուն պայմաններու մէջ յայտնուած են դժուար կացութեան մէջ:

Ներկայիս ծրագիրն իր գործունէութիւնը կը ծաւալէ Լիբանանի, Սուրիոյ, Թուրքիոյ, Իսրայէլի, Հայաստանի, Արցախի եւ Վրաստանի մէջ, ուր Հայաստանի մասնաբաժինն ամենամեծն է:

ԱՄՆ «Ճինիշեան» յիշատակի ծրագիրը գործունէութիւն կը ծաւալէ կրթութեան, առողջապահութեան, գիւղատնտեսութեան, քաղաքացիական հասարակութեան, տնտեսութեան եւ համայնքային զարգացման ոլորտներուն մէջ` իրականացնելով մարդասիրական եւ զարգացման ուղղուած բազմաթիւ ծրագիրներ` հաշուի առնելով տուեալ երկրին մէջ առկայ առաջնային խնդիրները, մարտահրաւէրները եւ զարգացման հնարաւորութիւնները:

 

 

 

 

Scroll Up