Լոս Անճելըսի ՄԷջ Կայացած Է Հայկական Գինիի Առաջին Փառատօնը

Հայկական գինիի փառատօնը Կլենտէլի մէջ բացառիկ առիթ էր ներկայացնելու հայկական գինեգործութեան 6000-ամեայ պատմութիւնն ու ժամանակակից արտադրութիւնը ԱՄՆ-ի մէջ:

«Հայերն այսօր»-ը, յղում կատարելով «Ասպարէզ» օրաթերթին, կը յայտնէ, որ յունիս 10-ին կայացած ձեռնարկը համախմբած էր Հայաստանի եւ աշխարհի տարբեր երկիրներու հայ գինեգործները, որոնց յաջողութեան գրաւական կարելի է համարել նաեւ այս ոլորտին մէջ ազգային աւանդոյթները: «Քօշ», «Քուռ», «Կատարօ», «Կարաս», «Ոսկենի», «Ոսկեվազ», «Վան Արդի», «Արմաս», «Չագլասիան», «Թութունջեան», «Լուսոյ Դելա Տէրա» ապրանքանիշները, որոնք ներկայացուած էին փառատօնին, համաշխարհային շուկային մէջ հասցուցած են մեծ հեղինակութիւն ձեռք բերել: Այս մասին վկայեցին նաեւ Կլենտէլի «Չեւի Չէյզ Քաունթրի Քլապ» հաստատութեան մէջ իրականացուող մէկօրեայ ձեռնարկին ներկայ ոլորտի ամերիկեան ներկայացուցիչները, ացելուները:

Փառատօնի մտայղացող ու կազմակերպիչ Ստեփան Փարթամեանի կարծիքով` նման ձեռնարկը լաւագոյն ձեւն է` ներկայացնելու հայկական ժամանակակից գինեգործութիւնն ու Հայաստանի մէջ առկայ գործարար հնարաւորութիւնները:

Հայաստանէն, Քալիֆորնիոյ տարբեր շրջաններէ, Արժանթինէն, Չիլիէն հայազգի գինեգործներ, ներմուծող ընկերութիւններու ներկայացուցիչներ փառատօնի ծիրէն ներս առանձին տաղաւարներով կը ցուցադրէին գինիներու, նաեւ` քոնեակի, օղիի, սնունդի տեսականիներ:

Փառատօնի կազմակերպչական աշխատանքներուն մասնակից, սոմելիէ Անոյշ Ղարիբեան, որ գինիի եւ գինեգործութեան մասին հանդէս եկաւ նաեւ դասախօսութեամբ, տեղեկացուց, որ փառատօնին մասնակցելու հրաւէր  ուղարկուած է Հայաստանի բոլոր գինեգործներուն, սակայն տարբեր պատճառներով շատերը առիթ չեն ունեցած մասնակցելու: Ան նշեց, որ յաջորդ տարի փառատօնն առաւել ընդգրկուն կ՛ըլլայ մասնակիցներու առումով, իսկ մինչ այդ յորդորեց ամերիկահայերուն աշխուժօրէն ներգրաւուելու հայկական գինիներու տարածման գործին` դառնալով  գինիի իւրատեսակ դեսպան օտարներու մօտ:

Փառատօնի ծիրէն ներս կայացած դասընթացներու բանախօսներէն էր նաեւ Հիւսիսային Ամերիկայի Սոմելիէներու միութեան գլխաւոր քարտուղար Իրինա Պոնոմարիենկոն:

Ձեռնարկը  աւարտեց հանդիսաւոր խնճոյքով: Յատկանշական էր, որ կերակրատեսակները կը մատուցուէին համապատասխան գինիներու հիւրասիրութեամբ, իսկ Ստեփան Փարթամեան կը ներկայացնէր տուեալ գինիի պատմութիւնը:

Սփիւռքի նախարար Մխիթար Հայրապետեանի նորանշանակ խոհրդական, գինեգործ Վահէ Քէոշքերեանն ալ պատմեց հայկական գինեգործութեան աւանդոյթներու ու ներկայի մասին:

Փառատօնի երաժշտականութիւնը ապահովեց «Ռոմա Քանեան »- եռեակը:

 

Scroll Up