Իրանահայ Բժիշկներն Անվճար Հետազօտութիւններ Կ՛իրականացնեն Արցախի Մէջ

Նախօրէին «Թուֆէնկեան» բարեգործական հիմնադրամի նախաձեռնութեամբ Ստեփանակերտ ժամանած իրանահայ բժիշկները սկսած են անվճար հետազօտութիւններ:

«Արցախփրես»-ի թղթակիցին հետ զրոյցին մանկաբոյժ-սրտաբան Արամ Քոչարեան ըսած է, որ առաջին օրը հետազօտութիւններ իրականացուցած են «Արեւիկ» մանկական բժշկական միաւորում ՓԲԸ-ի մէջ:

««Արեւիկ» բժշկական միաւորման մէջ զննած ենք աւելի քան 23 երեխայի: Այսօր կը հետազօտենք «Մօր եւ մանկան առողջութեան պահպանման կեդրոն»-ի այցելուներուն, իսկ վաղը կ’աշխատինք Մարտակերտի շրջանային բժշկական միաւորման մէջ: «Մօր եւ մանկան առողջութեան պահպանման կեդրոն»-ին մէջ մեր կողմէ իրականացուած է սաղմի ներարգանդային Echocardiography:

Կը կարծեմ` «Թուֆէնկեան» բարեգործական հիմնադրամին կողմէ սա շատ կարեւոր քայլ է, քանի որ այցի ընթացքին յղիները հնարաւորութիւն ունին անցնելու հետազօտութիւն հէնց տեղուոյն վրայ»,- աւելցուցած է Ա. Քոչարեան:

Իր հերթին իրանահայ բժիշկ, ուլտրաձայնային մասնագէտ Ալֆրետ Աւագեան նշած է, որ ուրախալի է Արցախի մէջ տեսնել կատարելագործուած բուժանձնակազմ եւ արդի պահանջներուն համապատասխանող հիւանդանոցներ:

«Համոզուած եմ, որ այս պայմաններուն մէջ տեղի բժիշկները կ’ապահովեն աշխատանքի շատ աւելի բարձր մակարդակ` նպաստելով բնակչութեան առողջական վիճակի կայունացման»,- ըսած է Ա. Աւագեան:

Scroll Up