Հայաստանի Առաջին Հանրապետութեան Եւ ՀՄԸՄ Հիմնադրման 100-ամեակներուն Նուիրուած Ձեռնարկներ Հոլանտայի ՄԷջ

Յունիս 8-ին Հոլանտայի Հենգելօ քաղաքին մէջ տեղի ունեցաւ Հայաստանի Առաջին Հանրապետութեան 100-ամեակին նուիրուած համերգ, որ կազմակերպած էր Հոլանտայի  ՀՅԴ «Արամ Մանուկեան» կոմիտէն: Ներկաներուն մէջ էին Հոլանտայի մէջ ՀՀ դեսպան Գարեգին Մելքոնեան, Ալմելոյի Հայ առաքելական եկեղեցւոյ հոգեւոր հովիւ Տէր Մաշտոց քահանայ Բաղդասարեան, հայ համայնքային կազմակերպութիւններու ղեկավարներ եւ այլք:

Ողջոյնի խօսքով հանդէս եկան ՀՀ դեսպան Մելքոնեան եւ Հոլանտայի ՀՅԴ «Արամ Մանուկեան» կոմիտէի ներկայացուցիչ Մինաս Արսէնեան: Դեսպանն անդրադարձաւ մայիսեան հերոսամարտերուն եւ Առաջին Հանրապետութեան հիմնադրման պատմական նշանակութեան` մասնաւորապէս, ընդգծելով վերջինիս կարեւորութիւնը հայ ազգային գիտակցութեան մէջ պետականութեան գաղափարի ամրապնդման գործին մէջ: Ան նշեց, որ թէեւ Առաջին Հանրապետութիւնը` որպէս անկախ պետութիւն, երկար չգոյատեւեց, սակայն կարեւոր նշանակութիւն ունեցաւ դարաւոր պայքարի արդիւնքով պետականութեան վերականգնման եւ հայկական պետութեան վերաստեղծման առումով: ՀՀ դեսպանը ողջունեց, որ սփիւռքի մէջ կը նշեն եւ կարեւոր կը համարեն Մայիս 28-ի խորհուրդը` առանձնացնելով Հայաստան-Արցախ-Սփիւռք միասնութեան կարեւորութիւնը հայ ժողովուրդի եւ Հայաստանի զարգացման հարցին մէջ:

Ձեռնարկին  ընթացքին հնչեցին ժողովրդական երգեր` Ներսիկ եւ Արաբօ Իսպիրեաններու կատարմամբ:

Յունիս 11-ին Հոլանտայի Արնհեմ քաղաքին մէջ տեղի ունեցաւ Հայաստանի Առաջին Հանրապետութեան եւ Հայ մարմնակրթական ընդհանուր միութեան հիմնադրման 100-ամեայ տարեդարձներուն նուիրուած ձեռնարկ, որ կազմակերպած էր ՀՄԸՄ Արնհեմի Մեկուսի շրջանը: Ձեռնարկին  ներկայ էին Արնհեմի, Ալկմաարի, Ալմելոյի եւ Միւնխենի ՀՄԸՄ-ի կառոյցներու ներկայացուցիչներ:

Ողջոյնի ուղերձով հանդէս եկաւ Հոլանտայի մէջ ՀՀ դեսպան Գարեգին Մելքոնեան: Շնորհաւորելով ներկաները` դեսպանը մաղթեց անոնց նոյն նուիրուածութեամբ եւ ոգեւորութեամբ շարունակելու համահայկական կարեւոր առաքելութիւնը: Ան ընդգծեց ՀՄԸՄ-ի դերակատարութիւնը հայ երիտասարդութեան հայրենասիրական ոգիով դաստիարակելու, աշխարհի տարբեր երկիրներու մէջ գտնուող հայկական համայնքներու, անոնց եւ հայրենիքի միջեւ կապերու ամրապնդման գործին մէջ:

Ձեռնարկին ծիրէն ներս  տեղի ունեցաւ սկաուտական քայլերթ եւ տարբեր կառոյցներու խումբերու միջեւ ֆութպոլի մրցաշար:

 

Scroll Up