«Հայեացքս Միշտ Դէպի Հայրենիք Բերող Ճանապարհին Ուղղուած Է». Յակոբ Փանոսեան

Երուսաղէմի Հայ երիտասարդաց միութեան ատենապետ Յակոբ Փանոսեան «Հայերն այսօր»-ի  հետ զրոյցին կը ներկայացնէ միութեան առաքելութեան, կատարած աշխատանքներու  մասին, որոնց գլխաւոր առանցքին մէջ  եղած է Սփիւռքի մէջ ազգային-մշակութային արժէքներու պահպանումը եւ աշխարհասփիւռ հայ երիտասարդներուն` Հայրենիքի հետ կապերը  սերտացնելուն նպաստելը:

-Պարո՛ն Փանոսեան, ե՞րբ  ստեղծուած է Երուսաղէմի Հայ երիտասարդաց միութիւնը եւ ի՞նչ նպատակով:

-Երուսաղէմի Հայ երիտասարդաց միութիւնը ստեղծուած է 80 տարի առաջ: Ունինք ֆութպոլի, պասկեթպոլի, մշակութային, սկաուտական, թատերական խումբեր, կը գործեն պարախումբ ու երգչախումբ, ինչպէս նաեւ կը հրատարակուի «ՀԵՄ» եռամսեայ թերթը:

Երիտասարդներու մտահորիզոնը զարգացնելու նպատակով Հայաստանէն եւ այլ երկիրներէ գիտնականներ եւ մտաւորականներ  պարբերաբար կը հրաւիրենք միութիւն, որոնք դասախօսական-բանախօսական արդիւնաւէտ հանդիպումներ կ՛իրականացնեն:

 Մեր գլխաւոր նպատակը հայ երիտասարդներու հոգիին մէջ Հայրենիքին օգտակար ըլլալու միտքը միշտ արթուն պահելը, հայեցի կրթութիւն եւ դաստիարակութիւն տալն է, որպէսզի օտար ափերու վրայ անոնք ուծացման չենթարկուին, արժանապատիւ հայ մեծնան` պահպանելով ազգային դիմագիծը: Կարծես`յաջողած ենք. անոնց գիտակցութեան մէջ ազգ-հայրենիք գաղափարը շատ զօրեղ է, քանի որ ակումբի կամարներուն ներքոյ միշտ կը թեւածէ հայկական մթնոլորտը: Այնտեղ երիտասարդներու  համար «Փոքրիկ» Հայաստան ստեղծած ենք:

 Առհասարակ, միշտ նեցուկ  եղած ենք մեր Հայրենիքի շէնացման եւ յետագային եւս պատրաստ ենք ծառայելու այդ սրբազան գործին:

– Երուսաղէմահայ երիտասարդներուն ճանաչողական այցելութեամբ Հայաստան կը բերէք:

-Այդպիսի նախաձեռնութեամբ հանդէս  եկած եմ 2004 թուականին, երբ քառասունչորս երիտասարդներ Հայաստան բերի` ծանօթացնելու տեսարժան, պատմամշակութային վայրերուն, ինչպէս նաեւ բանակումի մասնակցելու: Շատ տարիներ անցած են, եւ մինչեւ հիմա անոնք կը յիշեն Հայաստանի մէջ անցուցած հիանալի օրերը:

Այդ ճամփորդութենէն յետոյ աւելի կապուեցան իրենց Հայրենիքին. ամէն ամառ միշտ Հայաստան կու գային` աշխարհի տարբեր երկիրներու մէջ գտնուող իրենց բարեկամներուն եւ ընկերներուն հրաւիրելով Հայաստան` այստեղ հանդիպելու եւ միասին լաւ ժամանակ անցնելու նպատակով: Բոլորի երազը կրկին վերադառնալը կ՛ըլլայ, եւ իմ հայեացքն ալ միշտ դէպի Հայրենիք բերող ճանապարհին ուղղուած է:

Տղաս ալ այս տարի աւարտեց Հայաստանի ամերիկեան համալսարանը: Ան այնքա՜ն  սիրած է Հայաստանը, որ չուզեր վերադառնալ Երուսաղէմ:

-Պարո՛ն Փանոսեան, ի՞նչը Ձեզ կը մղէ հայապահպան գործեր կատարելու համար:

-Ըլլաով Հայոց ցեղասպանութիւն տեսածներու ժառանգ, հասկնալով, թէ նախնիներս ինչ զրկանքներ  կրած են գաղթի ճանապարհին` պարտքս կը համարեմ անոնց անմահ յիշատակին առջեւ ազգանպաստ գործեր կատարելը. այդպիսով հոգեպէս հանգիստ կը զգամ:

– Երբ  եղած է ձեր առաջին այցելութիւնը  հայրենի՞ք:

– Եղբօրս յորդորով 2000 թուականին առաջին անգամ եկայ Հայաստան: Այդ այցելութիւնը, կարելի է ըսել, շրջադարձային եղաւ ինծի համար. շատ սիրեցի Հայաստանի ամէն մէկ անկիւնը, անբացատրելի կապուածութիւն յառաջացաւ առ Հայրենիք:

Ատկէ  յետոյ աւելի յաճախակի դարձուցի այցելութիւններս: Ամէն անգամ Հայաստանի մէջ գտնուելուս` ընտանիքիս հետ կը շրջինք տարբեր վայրերով, կը լիցքաթափուինք, նաեւ լաւ ժամանակ կ՛անցնեմ ընկերներուս հետ:

-Պարո՛ն Փանոսեան, ի՞նչ գնահատական կու տաք Հայաստանի մէջ տեղի ունեցած Թաւշեայ յեղափոխութեան:

–Անշուշտ, ամէն վայրկեան կը հետեւէինք Հայաստանի մէջ տեղի ունեցող իրադարձութիւններուն: Սփիւռքն ալ, որքան նկատած եմ, ուրախ է Հայաստանի մէջ տեղի ունեցած Թաւշեայ յեղափոխութենէն` լիայոյս սպասելով, որ յետագային ամէն ինչ լաւ պիտի ըլլայ: Մեր պետութիւնն ուղիղ ճանապարհի վրայ կը գտնուի, միայն պէտք է ժողովուրդը համբերութեամբ եւ յոյսով լեցուած` սպասէ, որ ամէն ինչ լաւ պիտի ըլլայ: Համոզուած եմ` ոչինչէն միանգամէն չենք հասնիր:

Պէտք է ձեռք բերուած հնարաւորութիւնները խելամիտ օգտագործել եւ թոյլ տալ ՀՀ կառավարութեան նոր Հայրենիք կերտել: Հայերն ասուածընտրեալ ազգ են, մենք շատ դժուարութիւններ յաղթահարած ենք: Ազգային համախմբուածութիւն ցուցաբերելով` կը յաղթահարենք մեր առջեւ ծառացած մարտահրաւէրներն ու նոր յաղթանակներ կը գրանցենք:

Գէորգ Չիչեան

Scroll Up