«Հալէպի ՄԷջ Սուրիահայերը Բնականոն Հունով Կ՛ապրին». Ժիրայր Ռէիսեան

«2016 թուականի դեկտեմբերին Հալէպի ազատագրումը անկիւնադարձային եղաւ սուրիահայերուն համար. ներկայիս Հալէպը շատ աւելի կայուն վիճակի մէջ կը  գտնուի: Կային կենցաղային դժուար պայմաններ, որոնք այսօր արդէն տարբեր միջոցներով յաղթահարուած են, ճանապարհներն օրը օրին կը բացուին, լուծուած է ջրամատակարարման ու վառելանիւթի խնդիրը, քիչ տատանումներով վերականգնուած է ելեկրտականութիւնը»,–«Հայերն այսօր»-ի հետ զրոյցին ըսաւ Սուրիոյ խորհրդարանի հայազգի պատգամաւոր, Բերիոյ Հայոց թեմի մամլոյ խօսնակ ժիրայր Ռէիսեան` աւելցնելով, որ սուրիահայերը բնականոն հունով կ՛ապրին, զբաղուած են իրենց առօրեայ աշխատանքներով եւ տուները վերանորոգելով:

Ան  նշեց նաեւ, որ ազգային հաստատութիւնները, եկեղեցիները, ակումբներն ու դպրոցներն ամենածանր օրերուն անգամ չեն դադրեցուցած ազգապահպան գործունէութիւնը, թէեւ ատոնցմէ շատերը պատերազմի հետեւանքով լուրջ վնասներ  կրած են: Այսօր, սակայն, սուրիահայ համայնքը տարբեր ճանապարհներով կը փորձէ վերականգնել աւերուած շինութիւնները:

Ազգային իշխանութեան ջանքերով  «Քարէն Եփփէ» ազգային ճեմարանի շէնքերէն մէկուն վերականգնումն իրականացուած է անցեալ տարուան ամրան, ուր եւ ընթացած է անցնող ուսումնական տարին: Հալէպի հայ ազգային պատսպարանի (մանկատուն) վերանորոգումն ամբողջութեամբ աւարտած է, պատսպարանի սաները բաւական ժամանակ  է այնտեղ վերադարձած են: Մեծ վնասներ կրած Սուրիահայ օգնութեան խաչի ընկերաբժշկական կեդրոնի վերականգնման մասնագիտական ուսումնասիրութիւններն աւարտած են, շուտով կը սկսի վերանորոգման աշխատանքները:

Սուրիահայ պատգամաւորը նաեւ ընդգծեց, որ Քեսապի ու Լաթաքիոյ հայերը կ՛ապրին սովորական կեանքով, իսկ այն մարդիկ, որոնք Հալէպէն տեղափոխուած էին Լաթաքիա կամ Քեսապ, այսօր կը վերադառնան իրենց տուները: Դամասկոս նոյնպէս կարելի է ազատագրեալ տարածք համարել: Մօտ ժամանակահատուածի մէջ , որոշակի անվտանգութեան հարցեր կարգաւորելէ յետոյ, իր աշխատանքները կը սկսի նաեւ Սուրիոյ օդակայանը:

Զրոյցի աւարտին Ժիրայր Ռէիսեան անդրադարձաւ նաեւ Մեծի Տանն Կիլիկիոյ Արամ Ա կաթողիկոսի օրհնութեամբ մարտ ամսուն Բերիոյ Հայոց թեմի առաջնորդ Գերաշնորհ Տէր Շահան արքեպիսկոպոս Սարգիսեանի` ազգային իշխանութեան ներկայացուցիչներուն հետ Տէր Զօր կատարած այցելութեան, ուր նախ հանդիպած են Տէր Զօրի նահանգապետին եւ անոր փոխանցած Նորին Սրբութեան ողջոյնները, ապա այցելած Սրբոց Նահատակաց համալիր:

Աւելցնենք, որ Արամ Ա կաթողիկոսը Սուրիոյ եւ յատկապէս Տէր Զօրի շրջանին մէջ անվտանգութեան կայունացումէն յետոյ կոչ պիտի ուղղէ հայ ժողովուրդին, որպէսզի համազգային ճիգերով  վերականգնուի ցեղասպան Թուրքիոյ կողմէ քանդուած մեր նահատակներու սրբազան տաճարը:

Գէորգ Չիչեան

 

Scroll Up