ՀԲԸՄ Պուէնոս Այրէսի Մասնաճիւղը Կը Շարունակէ Իր Հայապահպան Գործունէութիւնը

Մայիսեան տօնակատարութիւնները Հայաստանի մէջ մէկտեղեցին աշխարհասփիւռ հայերուն.անոնք մեծ խանդավառութեամբ եկած էին` մասնակցելու կազմակերպուած ձեռնարկներուն եւ վայելելու հայաշունչ այն մթնոլորտը, որ կը թեւածէր Սարդարապատի յուշահամալիրին եւ մայրաքաղաք Երեւանի մէջ:

Ուխտաւոր հայորդիներուն մէջ էին նաեւ Արժանթինի հայկական համայնքի մեր հայրենակիցները, որոնցմէ ՀԲԸՄ Պուէնոս Այրէսի մասնաճիւղի քարտուղարուհի Սուսաննա Տէր-Կարապետեան-Նահապետեանի եւ փոխքարտուղար Խուան Գառլոս-Մուրատեանի հետ զրուցած է «Հայերն այսօր»-ը:

Անգամ մը եւս վայելեցինք մեր Հայրենիքը

Սուսաննա Տէր-Կարապետեան-Նահապետեան- արժանթինահայերու խումբով եկած էինք Հայաստան` մասնակցելու Մայիսեան հերոսամարտերու եւ Հայաստանի Առաջին Հանրապետութեան հռչակման 100-ամեակի տօնական ձեռնարկներուն:

Չէինք կրնար այդ տօնական օրերուն մեր Հայրենիքին մէջ չգտնուիլ: Մեզի նաեւ հնարաւորութիւն  ընձեռուած էր  անգամ մը եւս վայելելու Հայրենիքի օդն ու ջուրը եւ մարդոց բարի ժպիտները:

Խումբին մէջ կային մարդիկ, որոնք առաջին անգամ կու գային Հայաստան, եւ ըսեմ, որ շատ սիրած են իրենց Հայրենիքը, հիացած են վերադառնալու Արժանթին:

Խուան Գառլոս Մուրատեան-Ծրագիրին մէջ ներառած էինք նաեւ այցելութիւն Արցախ, ուր հրաշալի օրեր անցուցած ենք:

Շրջելով Արցախ աշխարհով, զգալով հնամենի եկեղեցիներու ու ճարտարապետական միւս կառոյցներու հայկական ոգին` անխօս, մէկ անգամ եւս համոզուեցանք, որ այն եղած է եւ կը մնայ հայկական տարածք եւ որ պէտք է միասնաբար շարունակել պայքարիլ Արցախի ամէն հողակտորի մը համար:

Սուսաննա Տէր-Կարապետեան-Նահապետեան–Արցախի մէջ արդիւնաւէտ հանդիպում ունեցանք ԱՀ կրթութեան, գիտութեան եւ մարմնակրթութեան նախարար Նարինէ Աղաբալեանի հետ: Անոր ներկայացուցինք նաեւ Արցախի հիմնախնդիրներու լուծման ուղղուած մեր կատարած բարեգործական ծրագիրները:

Հանդիպեցանք նաեւ ՀՀ սփիւռքի նորանշանակ նախարար Մխիթար Հայրապետեանի հետ: Անոր տեղեկացուցինք, որ յետագային նոյնպէս պատրաստ ենք աշխատելու Հայաստան-Սփիւռք կապերու ամրապնդման ուղղութեամբ: Այցելելով Մայր Աթոռ Սուրբ Էջմիածին` ստացանք նաեւ Ն.Ս.Օ.Տ.Տ Գարեգին Բ Ամենայն Հայոց Կաթողիկոսի օրհնութիւնը:

Հայկական ճաշատեսակները` այցեքարտ Հայաստան գալու համար

Խուան Գառլոս Մուրատեան-ՀԲԸՄ-ի Պուէնոս Այրէսի մասնաճիւղին համար տարին յագեցած է տարաբնոյթ ձեռնարկներու կազմակերպմամբ:

Կարեւոր նախաձեռնութիւններէն մէկը տեղի պիտի ունենայ յունիս 12-ին. ԱՄՆ-ի մէջ ԼՂՀ մշտական ներկայացուցիչ Ռոբերտ Աւետիսեան Պուէնոս Այրէսի մէջ դասախօսութիւն պիտի ունենայ արժանթինահայ համայնքին համար: Այս հանդիպումով կը ցանկանք արժանթինահայերու մօտ աւելի զօրեղացնել Արցախի համար մտահոգ ըլլալու խնդիրը:

Իսկ օգոստոս 16-ին Արժանթինի մէջ Ֆրանսայի դեսպանատան մէջ տեղի պիտի ունենայ ձեռնարկ` նուիրուած հոկտեմբեր ամսուն Երեւանի մէջ կայանալիք Ֆրանկոֆոնիայի 2018թ. գագաթնաժողովին: Նաեւ համերգ կը նախատեսուի:

Խուան Գառլոս Մուրատեան-ՀԲԸՄ-ի Պուէնոս Այրէսի մասնաճիւղի «Մարի Մանուկեան» դպրոցն արդէն 35 տարի է, որ ձեւաւորուած աւանդոյթի համաձայն` աւարտական դասարաններու հայ աշակերտներուն իւրօրինակ ծրագիրով կը բերէ Հայաստան: Աւարտական դասարաններու աշակերտները մէկ տարի շարունակ իրենց ծնողներուն հետ հայկական տարբեր կերակուրներ կը պատրաստեն եւ շաբաթը երկու անգամ` ուրբաթ եւ շաբաթ օրերուն, այն կը վաճառուի դպրոցի սրահներէն մէկուն մէջ գտնուող խորհրդանշական ճաշարանի մէջ:

ճաշացանկը բաղկացած կ՛ըլլայ հիմնականին մէջ հայկական տարբեր տարածաշրջաններու ճաշատեսակներէ` հումուս, թաբուլէ, հարիսա, պահքի տոլմա, խորովածի տեսականի եւ այլն: Հաւաքուած գումարով ամառնային արձակուրդին անոնք Հայաստան կու գան: Ընդհանուր առմամբ` այս տարիներուն շուրջ 800 սփիւռքահայ պատանիներ եւ  աղջիկներ  եկած են իրենց պապերու երկիրը: Խումբին մէջ կ՛ըլլան երեխաներ, որոնք առաջին անգամ կու գան Հայրենիք:

Սուսաննա Տէր-Կարապետեան-Նահապետեան – վստահաբար կրնանք ըսել, որ այս ծրագիրը միայն արժանթինահայ երեխաներուն սոսկ հայկական ճաշատեսակներ պատրաստել սորվեցնելը չէ, այլեւ այն հայրենասիրութեան  մեծ դարբնոց մըն է:

Երեխաները մեծ ոգեւորութեամբ կը ներգրաւուին ծրագիրին մէջ` փորձելով հնարաւորինս լաւ ցուցանիշ գրանցել: Հիւրասիրութիւն-վաճառքին կը մասնակցին ոչ միայն Պուէնոս Այրէսի հայ համայնքի ներկայացուցիչները, այլեւ այլազգիներ, որոնք կը հիանան երիտասարդներու հիւրասիրութիւնով ու սրտաբաց ընդունելութիւնով:

Անոնք հեռանալուն կատակով կ՛ըսեն, որ «հայեացուցինք» իրենց, եւ որ իրենց ազգանունին այսուհետեւ «եան» մասնիկը պիտի աւելցնեն:

Մեր գլխաւոր նպատակը արժանթինահայ երիտասարդներուն այս ծրագիրին միջոցով մօտէն Հայրենիքին ծանօթանալու հնարաւորութիւն տալն է: Միանշանակ կրնամ ըսել, որ անոնք տասնհինգ հիանալի օրեր անցնելով Հայաստանի մէջ` ամուր կերպով կը կապուին Հայրենիքին եւ կրկին վերադառնալու ցանկութիւն կը յայտնեն:

Այդ ընթացքին նաեւ կամաւոր աշխատանքերով կը զբաղին. Դպրոցներու մէջ շինարարական աշխատանքներ կը կատարեն, բարեգործական այցելութիւններ կու տան անապահով ընտանիքներու եւ այլն:

Յ.Գ.-աւարտին   մեր զրուցակիցները շնորհաւորեցին հայ ժողովուրդը` մայիսեան փառապանծ տօներուն առիթով` ցանկալով բոլորին ազգային համախմբուածութիւն, խաղաղութիւն եւ ընդգծեցին, որ միշտ պատրաստ են օգտակար ըլլալու Հայաստանի շէնացման գործին:

Գէորգ  Չիչեան

Scroll Up