«Արի Տուն». Ուղեւորութիւն Դէպի Հայրենիք

2017-2018 ուսումնական տարուայ սկիզբը Տիւմենի Մեսրոպ Մաշտոցի անուան հայկական մշակոյթի կեդրոնին մէջ յայտարարուեցաւ «Արի տուն» հայագիտական մտաւոր խաղ-մրցոյթի մասին: Նշուեցաւ, որ  մրցոյթի երեք փուլերուն ամենաշատ միաւորներ հաւաքած աշակերտը կը ստանայ ուղեգիր` մասնակցելու Հայաստանի Հանրապետութեան սփիւռքի նախարարութեան կողմէ կազմակերպուող «Արի տուն» ծրագիրին:

Ինչպէս «Հայերն այսօր»-ին կը յայտնէ մշակութային կեդրոնի ղեկավար Ռուզաննա Դանիէլեան, հայկական դպրոցի աշակերտները մեծ ջանասիրութեամբ ձեռնամուխ եղան մրցոյթին պատրաստուելու եւ ատոր մասնակցելու աշխատանքներուն: Անոնք ուժ  ու եռանդ չխնայեցին եւ ողջ ուսումնական տարուան ընթացքին մեծ պատրաստակամութեամբ եւ պատասխանատուութեամբ  յաճախեցին հայկական մշակոյթի կեդրոնի հայերէնի, հայոց պատմութեան ու հայրենագիտութեան դասընթացներուն, փորձուած մանկավարժներու օգնութեամբ հարստացուցին գիտելիքներու իրենց պաշարները եւ մեծ խանդավառութեամբ մասնակցեցան մրցոյթի առաջին եւ երկրորդ փուլերուն:

Առաջինը, որ կոչուեցաւ պարզապէս «Ասմունքի մրցոյթ», անցաւ փետրուար 24-ին: Մրցոյթին մասնակցելու ցանկութիւն յայտնեցին մշակոյթի կեդրոնի 23 աշակերտներ` տարբեր տարիքային խումբերէն: Անոնք ցուցադրեցին իրենց կարողութիւնները եւ հմտութիւնները հայ գրականութենէն, որոնք կ՛արտայայտուէին արտայայտիչ արտասանութեամբ, հայ խօսքի գրագէտ եւ ճշգրիտ արտասանութեամբ: Ժիւրիին կողմէ գնահատուեցաւ նաեւ անոնց դերասանական արուեստը եւ լրացուցիչ տեղեկութիւնները բանաստեղծութիւններու հեղինակներու` հայ մեծանուն բանաստեղծներու վերաբերեալ:

Երկրորդ փուլը` «Ճանաչիր Հայրենիքդ» հայագիտական մրցոյթն իրականացուեցաւ ապրիլ 8-ին` գրաւոր քննութիւններու ձեւով: Երեխաները ներկայացուած չորս պատասխանէ կ՛ ընտրէին ճիշդ տարբերակը: Գրաւոր ստուգողական աշխատանքին մասնակցեցան 21 աշակերտ:  Արդիւնքները բաւականին գոհացուցիչ էին, եւ ատիկա արդիւնքն էր մշակոյթի կեդրոնի փորձառու մանկավարժներ Ալուան Պօղոսեանի, Մանուշակ Համբարեանի պատասխանատու աշխատանքին, որուն ներդրած մեծ ջանքերու շնորհիւ հայագիտական առարկաներու դասերուն մասնակցելու ցանկութիւն յայտնեցին աւելի մեծ թիւով աշակերտներ: Անոնք իրենց   կիրառած մանկավարժական մեթոտներով կը զարգացնեն  երեխաներու մտաւոր հնարաւորութիւնները եւ  դասերը  կը կազմակերպեն աննախադէպ հետաքրքիր, հետաքրքրաշարժ, որուն ընթացքին ստացած գիտելիքները մեր մասնակիցները երրորդ փուլին մէջ ներկայացուցին  ժիւրիի գնահատանքին:

Մայիս 27-ին տեղի ունեցաւ մրցոյթի երրորդ փուլը` «Հայ գիտակ» խորագիրով: Այն նուիրուած էր Հայաստանի Առաջին Հանրապետութեան 100-ամեայ յոբելեանին: Մրցոյթը կազմակերպուած էր բարձր մակարդակով, յագեցած ժամանակակից արհեստագիտական միջոցներով:

Պաստառին  վրայ նկարազարդ այբուբենը կը ծառայէր որպէս առաջադրուած հարցերու ծածկագիր: Եզրափակիչ փուլ անցած ութ աշակերտներն ալ աշխուժօրէն կը պատասխանէին հարցերուն, կը կատարէին լրացումներ, որուն շնորհիւ ալ ժիւրիի միաձայն որոշմամբ եւ բարերարներ` Ս. Ստեփանեանի, Ա. Հովէյեանի հովանաւորութեամբ բոլոր մասնակիցները ստացան ուղեգիրներ մեկնելու հայենիք` մասնակցելու «Արի տուն» ծրագիրին:

Scroll Up