Մայիսեան Տօները Նշուեցան ՀԲԸՄ Պուէնոս Այրէսի «Մարի Մանուկեան» Դպրոցին ՄԷջ

Հայկական բարեգործական ընդհանուր միութեան Պուէնոս Այրէսի մասնաճիւղի  «Մարի Մանուկեան» կրթական հաստատութիւնը մայիս 30-ին տօնական մթնոլորտի մէջ նշած է Մայիսեան հերոսամարտերու եւ Հայաստանի Առաջին Հանրապետութեան հռչակման 100-ամեակը:

Դպրոցի սրահը զարդարուած  եղած է հայկական դրօշի գոյներով, իսկ մանկապարտէզի, նախակրթարանի եւ երկրոդական դասարաններու աշակերտները խանդավառուած հանդէս  եկած են հայրենասիրական երգերով, պարերով եւ ասմունքով: Տօնական ձեռնարկին ներկայ եղած են Արժանթինի Հայոց թեմի առաջնորդ Գերաշնորհ Տէր Գիսակ արքեպիսկոպոս Մուրադեան, ՀԲԸՄ Պուէնոս Այրէսի մասնաճիւղի ղեկավարութիւնն ու ներկայացուցիչներ, համայնքային անդամներ եւ այլ հիւրեր:

«Բոլորիս հոգիները հպարտութեամբ եւ ազգային վառ ապրումներով  լեցուած էր, բացառիկ օր վայելեցինք, որ իր անջնջելի դրոշմը ձգեց դպրոցի աշակերտներուն եւ բոլոր ներկաներուն յիշողութեան մէջ: Մենք ամէն ջանք կը գործադրենք, որ անոնք միշտ հոգեպէս իրենց հայրենիքին մօտ զգան եւ չհեռանան իրենց արմատներէն»,–«Հայերն այսօր»-ի հետ զրոյցին ըսաւ ՀԲԸՄ պատուոյ անդամ, ՀԲԸՄ Պուէնոս Այրէսի  մասնաճիւղի փոխատենապետ Անթոնիօ Սարաֆեան` աւելցնելով, որ պիտի շարունակեն հաւատարիմ մնալ ՀԲԸՄ-ի որդեգրած առաքելութեան, այն է`  Սփիւռքի մէջ նպաստել  հայկական ժառանգութեան եւ աւանդոյթներու պահպանման` կրթական, մշակութային ու մարդասիրական ծրագիրներու միջոցով:

 

 

Scroll Up