Հայաստանի Առաջին Հանրապետութեան 100-ամեակին Նուիրուած Ձեռնարկներ Պուխարեստի Մէջ

Ռումանիոյ Հայոց թեմի առաջնորդ գերշ. Տ. Տաթեւ եպիսկոպոս Յակոբեանի նախաձեռնութեամբ եւ օրհնութեամբ մայիս 27-ին Պուխարեստի մէջ տեղի ունեցան Մայիսեան հերոսամարտերու եւ Առաջին Հանրապետութեան 100-ամեակին, Շուշիի ազատագրման եւ Արցախեան պատերազմին, ինչպէս նաեւ Ռումանիոյ միաւորման 100-ամեակին նուիրուած ձեռնարկներ:

Ինչպէս «Հայերն այսօր»-ին կը  յայտնեն Ռումանիոյ Հայոց թեմի մամլոյ դիւանէն, ժամը 10:30-ին Պուխարեստի առաջնորդանիստ Սրբոց Հրեշտակապետաց Մայր Տաճարին մէջ մատուցուեցաւ տօնական Սուրբ Պատարագ` ձեռամբ Թեմակալ Առաջնորդ Տ. Տաթեւ եպիսկոպոս Յակոբեանի եւ մասնակցութեամբ Կոնստանցայի Ս. Աստուածածին եկեղեցւոյ հոգեւոր հովիւ արժանապատիւ Տ. Օշական քահանայ Խաչատրեանի: Ներկայ էին Ռումանիոյ մէջ ՀՀ արտակարգ եւ լիազօր դեսպան Սերգէյ Մինասեան, հիւպատոսը, Ռումանիոյ Հայոց միութեան նախագահ Վարուժան Ոսկանեանը, թեմական ու ծխական խորհուրդներու անդամներ, հաւատացեալներ ու հիւրեր:

Քարոզի ընթացքին Սրբազան հայրը  անգամ մը եւս խօսեցաւ օրուայ խորհուրդին մասին` մասնաւորապէս նշելով. «Պատմութեան ընթացքին յաճախ զրկուած ենք ազգային պետականութենէն, յաճախ ոտնատակ եղած է մեր երկիրը, բայց աննկուն ու անխորտակ  մնացած է յոյսը եւ հաւատքը մեր, որմով շարունակ արարած ենք, մաքառած, հաւատացած Աստուծոյ եւ ապրած Աստուծոյ հետ: Ապրած ենք որպէս Հայոց Եկեղեցի եւ Հայոց պետութիւն` մէկ ու միաբան Տիրոջմով, բազմիցս խաչուած, բայց միշտ յարուցեալ Տիրոջմով: Աստուած մեզ հետ է, քանզի հակառակ հազարամեակներով չափուող մեր պատմութեան ընթացքին  կրած փորձութիւններուն, մահերուն ու կորուստներուն` կ՛ապրի հայութիւնը իբրեւ ազգ ու պետութիւն, իբրեւ եկեղեցի: Մայիսեան այս հերոսամարտերու շնորհիւ Արեւելեան Հայաստանը կը փրկուի ոչնչացումէ: Հայերու հերոսական ոգին, համաժողովրդական սխրանքը, յաղթանակը թրքական բանակին դէմ կ՛ապացուցեն, որ հայ ժողովուրդը հաստատակամ պիտի ապրի եւ իր դարաւոր արժէքները պահպանէ: Ազգային սիրոյ, համախմբման եւ հերոսական պայքարի այս հանգրուանէն սկիզբ կ՛առնէ Հայոց առաջին անկախ հանրապետութիւնը: Ամէն տարի այս օրը սերունդներուն համար ուխտի նորոգման օր է` սուրբ պահելու հայրերու նուիրական յիշատակն ու մնալու հաւատարիմ անոնց լոյս հաւատքին, հերոսական ոգիին, հայոց ազգը մէկտեղուած եւ հայոց երկիրը փրկուած տեսնելու անոնց երազին: Այսօր մենք կրկին համակուած ենք այն գիտակցութեամբ, որ Հայաստանի անկախութիւնը մեզ աւանդուած թանկ ու սրբազան ժառանգութիւն է: Չկայ առանց անկախութեան ապրած դարաշրջան մը հայոց պատմութեան մէջ, երբ մեր ժողովուրդը ձգտած ու մարտնչած չըլլայ վերագտնելու համար Հայաստանի ազատութիւնը: Այս ճշմարտութեամբ գօտեպնդուած միշտ հաւատարիմ ըլլանք Հայրենիքի առջեւ մեր պարտքին, որպէսզի մեր զաւակները ժառանգեն ազատ, հզօր ու բարօր Հայրենիք»:

Յաւարտ պատարագի կատարուեցաւ Գոհաբանական մաղթանք եւ աղօթք` նուիրուած Հայաստանի Առաջին Հանրապետութեան 100-ամեակին: Կատարուեցաւ նաեւ հոգեհանգիստ` ի յիշատակ Արցախեան պատերազմի, Մայիսեան հերոսամարտերու եւ առաջին համաշխարհային պատերազմի ընթացքին Ռումանիոյ միաւորման համար նահատակուած հայ հերոսներու: Այս առիթով երեք ծաղկեպսակներ դրուեցան եկեղեցւոյ պարտէզին մէջ կանգնեցուած հայ ազգային հերոս Անդրանիկ Օզանեանի յուշարձանին առջեւ: Խօսքով հանդէս եկան Ռումանիոյ մէջ ՀՀ արտակարգ եւ լիազօր դեսպան Սերգէյ Մինասեան եւ Ռումանահայոց միութեան նախագահ Վարուժան Ոսկանեան:

Արարողութիւններու աւարտէն ետք  ներկաները հրաւիրուեցան Առաջնորդարանի գեղեցիկ պարտէզ, ուր Ռումանիոյ Հայոց թեմի նախաձեռնութեամբ, աջակցութեամբ Պուխարեստի ծխական խորհուրդի եւ Ռումանահայոց միութեան կազմակերպուած էր տօնական ճաշկերոյթ եւ ձեռնարկ: Հայաստանին նուիրուած հայրենասիրական երգերով հանդէս եկաւ Արմինէ Խաչատրեան, իսկ ժողովրդական պարերով հանդէս եկաւ «Վարդավառ» պարային համոյթը:

Բոլոր ներկաներուն բաժնուեցան Ռումանիոյ Հայոց թեմին կողմէ նախապէս պատրաստուած Մայիսեան եռատօնի վերաբերեալ գրքոյկներ:

Scroll Up