«Թանգարաններու Գիշեր» Ձեռնարկին Միացած Են Հայաստանի Եւ Արցախի 116 Թանագարաններ

Այս տարի Հայաստանի մէջ Թանգարաններու գիշերը արդէն 15-րդ անգամ եւ 6-րդ անգամ Արցախի մէջ  կը նշուի մայիս 19-ին: Ձեռնարկը կ՛իրականացուի մայիս 18-ին նշուող Թանգարաններու միջազգային օրուան ամենամօտ շաբաթ օրը` Եւրոխորհուրդի, ԵՈՒՆԵՍԿՕ-ի եւ ԻԿՕՄ-ի հովանաւորութեամբ:

Թանգարաններու միջազգային օրը կը նշուի 1977 թուականէն` իւրաքանչիւր տարի մայիս 18-ին համախմբելով աւելի քան 30 հազար թանգարաններ աշխարհի տարբեր երկիրներէ:

Ինչպէս «Հայերն այսօր»-ին կը յայտնեն ՀՀ մշակոյթի նախարարութենէն, այս տարի ձեռնարկին միացած են Հայաստանի եւ Արցախի 116 թանագարաններ:

2018 թուականին ԻԿՕՄ-ի կողմէ ընտրուած Թանգարաններու միջազգային օրուայ խորագիրն է «Գերհաղորդակցուող թանգարաններ. նոր մօտեցումներ, նոր հանրոյթներ»: Միաժամանակ, երկօրեայ ձեռնարկներու ծրագիրին մէջ անդրադարձ պիտի ըլլայ նաեւ Առաջին հանրապետութեան 100-ամեակին:

Ձեռնարկներու ձեւաչափին համապատասխան` մայիս 18-ին` 10:00էն 18:00, իսկ մայիս 19-ին` 18:00-էն 00:00, Հայաստանի եւ Արցախի 116 թանգարաններու դռներն անվճար բաց կ՛ըլլան հասարակութեան համար: Մայիս 19-ին Երեւանի Մեթրոպոլիտէնը կ’աշխատի մինչեւ 01:00:

 

Scroll Up